பிரபல இயக்குநர் மனோபாலா காலமானார்!

பிரபல திரைப்பட இயக்குநரும், நகைச்சுவை நடிகருமான மனோபாலா உடல்நலக் குறைவால் காலமானார். இவருக்கு வயது 69.

மனோபாலா இதுவரை 40 திரைப்படம், 16 தொலைக்காட்சித் தொடர், 3 தொலைக்காட்சி திரைப்படங்களை இயக்கியுள்ளார். இவர் சமீபத்தில் குக் வித் கோமாளி நிகழ்ச்சியில் பங்கேற்று இருந்தார்.

தமிழ் சினிமாவின் திரைப்பட இயக்குனர், தயாரிப்பாளர், குணச்சித்திர நடிகர் மற்றும் நகைச்சுவை நடிகர் என்று பன்முகத் திறமைகளைக் கொண்டவர்  மனோபாலா.

மனோபாலா இயக்குநர் பாரதிராஜாவிடம் உதவி இயக்குநராக பணியாற்றியவர். ஆகாய கங்கை திரைப்படத்தின் மூலம் தமிழ் சினிமாவில் இயக்குநராக அறிமுகமானார். மேலும் ஊர்க்காவலன், சிறைப்பறவை, பிள்ளை நிலா போன்ற படங்களை இயக்கியுள்ளார்.

300க்கும் மேற்பட்ட படங்களில் குணச்சித்திர மற்றும் நகைச்சுவை நடிகராக நடித்துள்ளார். பிதாமகன், சிவகார்த்திகேயனின் காக்கி சட்டை, தனுஷின் மாப்பிள்ளை போன்ற படங்களில் நகைச்சுவையில் கலக்கி இருப்பார்.

மனோபாலா கல்லீரல் பிரச்னை காரணமாக 15 நாள்களக சிகிச்சைப் பெற்றுவந்த நிலையில், சென்னையில் உள்ள வீட்டில் அவர் காலமானார்.

அவரது இறப்புக்கு சினிமா நடிகர்கள், இயக்குநர்கள் தங்களது இரங்கலை தெரிவித்து வருகின்றனர்.