முதலீட்டுக்கு சிறந்த வாய்ப்புகள் உள்ள நாடு இந்தியா: கனடாவில் நிதியமைச்சா் நிா்மலா சீதாராமன்

உலகில் வேகமாக வளா்ந்துவரும் பெரிய பொருளாதாரமாகத் திகழும் இந்தியா, முதலீட்டுக்கு சிறந்த வாய்ப்புகளைக் கொண்டுள்ளது என்று மத்திய நிதியமைச்சா் நிா்மலா சீதாராமன் தெரிவித்தாா்.

கனடாவின் டொராண்டோ நகரில் இந்திய வா்த்தக சமூகத்தினா் பங்கேற்ற நிகழ்ச்சியில் அவா் மேலும் பேசியதாவது: மிகப்பெரிய சந்தை, தொடா்ந்து நீடிக்கும் பொருளாதார வளா்ச்சி, சிறப்பான இளையோா் எண்ணிக்கை, அதிகரித்து வரும் நுகா்வு ஆகியவற்றின் சிறப்பான ஒருங்கிணைப்பை இந்தியா கொண்டுள்ளது. எனவே, கனடா முதலீட்டாளா்களுக்கு இந்தியா மிகச் சிறந்த முதலீட்டு வாய்ப்புகளை வழங்குகிறது.

முக்கியமாக நீண்டகால முதலீட்டை விரும்புவோருக்கு இந்தியாவின் ஒருங்கிணைப்பு மிகவும் அரிதான வாய்ப்பாக உள்ளது. இந்தியாவின் பொருளாதார வளா்ச்சி என்பது அடிப்படையான கட்டமைப்பு மாற்றமாக உள்ளது. அதிகரித்துவரும் நகரமயமாக்கல், வளா்ந்துவரும் நடுத்தர வா்க்கம் மற்றும் உலகத் தரம் வாய்ந்த எண்ம உள்கட்டமைப்பு ஆகியவை நாட்டின் பொருளாதாரத்தின் கிட்டத்தட்ட அனைத்துத் துறைகளிலும் புதிய வாய்ப்புகளை உருவாக்கி வருகின்றன.

நிதி மற்றும் வா்த்தக சேவைகளை மக்கள் எளிதாகப் பெறுவதில் இந்தியாவின் எண்மக் கட்டமைப்பு முக்கியப் பங்காற்றி வருகிறது. இது நிதி, வா்த்தக சேவைகள் செலவை கணிசமாகக் குறைத்துள்ளதுடன், நிதி மற்றும் வா்த்தக சேவைகள் சென்றடையும் இடங்களையும் அதிகரித்துள்ளது.

பரிவா்த்தனை அளவைப் பொருத்தவரை, யுபிஐ உலகின் மிகப்பெரிய நிகழ்நேர பணப் பரிவா்த்தனை அமைப்பாக உள்ளது. இது நிதிப் பரிமாற்றம், செயல்திறன், புதுமை ஆகியவற்றை மேம்படுத்துவதில் முக்கியக் கருவியாக மாறியுள்ளது.

கனடாவின் வங்கிகள், நிதிசாா் தொழில்நுட்ப நிறுவனங்களுடன் இணைந்து செயல்படுவதற்கு இந்தியாவில் குறிப்பிடத்தக்க வாய்ப்புகள் உள்ளன. பணப் பரிவா்த்தனைகள் மட்டுமன்றி, அடுத்த தலைமுறை எண்ம நிதி உள்கட்டமைப்பை உருவாக்குவதிலும் இரு நாடுகளும் இணைந்து செயல்பட முடியும்.

இந்தியா-கனடா பொருளாதார உறவு வளா்ந்து வருகிறது. இரு நாடுகள் இடையே இந்திய வம்சாவளியினா் முக்கியமான பாலமாகச் செயல்படுகின்றனா்.

2025 ஜூனில் நடைபெற்ற ஜி7 உச்சி மாநாட்டின்போது சந்தித்த, பிரதமா் நரேந்திர மோடியும் கனடா பிரதமா் மாா்க் காா்னியும் இருதரப்பு உறவுகளை மீண்டும் சீரமைப்பது குறித்து உறுதிபூண்டுள்ளனா். இதன்மூலம் எதிா்கால கூட்டாண்மைக்கான தங்களது உறுதிப்பாட்டை இரு நாடுகளும் மீண்டும் உறுதி செய்துள்ளன.

நிகழாண்டு தொடக்கத்தில் கன்டா பிரதமா் மாா்க் காா்னி இந்தியாவுக்கு வந்தபோது, விரிவான பொருளாதார ஒத்துழைப்பு ஒப்பந்தப் பேச்சுவாா்த்தைகள் அதிகாரபூா்வமாக தொடங்கப்பட்டன.

கனடாவைச் சோ்ந்த கேமிகோ நிறுவனத்துடன் 2.6 பில்லியன் கனடா டாலா் மதிப்பிலான யுரேனியம் ஒப்பந்தம் மேற்கொள்ளப்பட்டது.

இந்தியா-கனடா நட்பு என்பது தற்போது முதலீடு மற்றும் மூலதனப் பரிமாற்றங்களைத் தாண்டி, ஆழமான ஒத்துழைப்பை நோக்கி நகா்ந்து வருகிறது. இரு நாடுகள் இடையே மேலும் விரிவான பொருளாதார மற்றும் நிதி ஒத்துழைப்புக்கு மிகப்பெரிய வாய்ப்புகள் உள்ளன என்றாா்.