வெற்றியுடன் நிறைவு செய்த பெங்களூரு: எலிமினேட்டரில் மும்பை - குஜராத் நாளை மோதல்

மகளிா் பிரீமியா் லீக் கிரிக்கெட்டின் கடைசி லீக் ஆட்டத்தில், நடப்பு சாம்பியனான ராயல் சேலஞ்சா்ஸ் பெங்களூரு 11 ரன்கள் வித்தியாசத்தில் மும்பை இண்டியன்ஸை செவ்வாய்க்கிழமை சாய்த்தது.

முதலில் பெங்களூரு 20 ஓவா்களில் 3 விக்கெட்டுகள் இழப்புக்கு 199 ரன்கள் சோ்க்க, மும்பை 20 ஓவா்களில் 9 விக்கெட்டுகள் இழப்புக்கு 188 ரன்களே எடுத்தது.

பிளே-ஆஃப் வாய்ப்பை இழந்த பெங்களூரு, வெற்றியுடன் விடை பெற்றது. 2-ஆம் இடம் பிடித்த மும்பை, எலிமினேட்டரில் குஜராத் ஜயன்ட்ஸை சந்திக்கிறது.

முன்னதாக டாஸ் வென்ற மும்பை பந்துவீசத் தீா்மானித்தது. பெங்களூரு இன்னிங்ஸில் சபினேனி மேக்னா - கேப்டன் ஸ்மிருதி மந்தனா இணை, முதல் விக்கெட்டுக்கு 41 ரன்கள் சோ்த்தது. மேக்னா 4 பவுண்டரிகள், 1 சிக்ஸருடன் 26 ரன்களுக்கு ஆட்டமிழந்தாா்.

ஒன் டவுனாக வந்த எலிஸ் பெரி, மந்தனாவுடன் பாா்ட்னா்ஷிப் அமைக்க, 2-ஆவது விக்கெட்டுக்கு 59 ரன்கள் கிடைத்தது. மந்தனா 6 பவுண்டரிகள், 3 சிக்ஸா்கள் உள்பட 53 ரன்களுக்கு விக்கெட்டை இழந்தாா்.

4-ஆவது பேட்டராக களம் புகுந்த ரிச்சா கோஷ் அதிரடி காட்டினாா். பெரியுடனான அவரின் 3-ஆவது விக்கெட் பாா்ட்னா்ஷிப்புக்கு 53 ரன்கள் கிடைத்தது. ரிச்சா 5 பவுண்டரிகள், 1 சிக்ஸருடன் 36 ரன்களுக்கு கடைசி விக்கெட்டாக பெவிலியன் திரும்பினாா்.

ஓவா்கள் முடிவில் எலிஸ் பெரி 5 பவுண்டரிகள், 1 சிக்ஸருடன் 49, ஜாா்ஜியா வோ்ஹாம் 10 பந்துகளில் 5 பவுண்டரிகள், 1 சிக்ஸருடன் 31 ரன்கள் விளாசி ஆட்டமிழக்காமல் இருந்தனா். மும்பை பௌலிங்கில் ஹேலி மேத்யூஸ் 2, அமெலியா கொ் 1 விக்கெட் வீழ்த்தினா்.

பின்னா் 200 ரன்களை வெற்றி இலக்காகக் கொண்டு விளையாடிய மும்பை தரப்பில், இன்னிங்ஸை தொடங்கிய ஹேலி மேத்யூஸ் 4 பவுண்டரிகளுடன் 19 ரன்களுக்கு ஆட்டமிழக்க, உடன் வந்த அமெலியா கொ் 9 ரன்களுக்கு நடையைக் கட்டினாா்.

3-ஆவது விக்கெட்டுக்கு இணைந்த நேட் சிவா் பிரன்ட் - கேப்டன் ஹா்மன்பிரீத் கௌா் கூட்டணி, 40 ரன்கள் சோ்த்து பிரிந்தது. கௌா் 20 ரன்களுக்கு விக்கெட்டை இழந்தாா். அதிரடியாக ரன்கள் சோ்த்த பிரன்ட் 35 பந்துகளில் 9 பவுண்டரிகள், 2 சிக்ஸா்கள் உள்பட 69 ரன்களுக்கு சாய்க்கப்பட்டாா்.

தொடா்ந்து வந்தோரில் சஜீவன் சஜனா 23, யஸ்திகா பாட்டியா 4, அமன்ஜோத் கௌா் 17, ஜி.கமலினி 6, சன்ஸ்கிருதி குப்தா 10 ரன்களுக்கு ஆட்டமிழந்தனா். ஓவா்கள் முடிவில் ஷப்னிம் இஸ்மாயில் 4, பருனிகா சிசோடியா 0 ரன்களுடன் களத்திலிருந்தனா்.

பெங்களூரு பௌலா்களில் ஸ்நேஹ ராணா 3, கிம் காா்த், எலிஸ் பெரி ஆகியோா் தலா 2, ஹீதா் கிரஹாம், ஜாா்ஜியா வோ்ஹாம் ஆகியோா் தலா 1 விக்கெட் வீழ்த்தினா்.