ஆஸி. ஓபன் பாட்மிண்டன்: சாய், சமீர் முன்னேற்றம்

ஆஸ்திரேலிய ஓபன் பாட்மிண்டன் போட்டியில் இந்தியாவின் சாய் பிரணீத், சமீர் வர்மா ஆகியோர் 2-ஆவது சுற்றுக்கு முன்னேறினர்.
முன்னதாக ஆடவர் ஒற்றையர் பிரிவு முதல் சுற்றில் போட்டித் தரவரிசையில் 2-ஆவது இடத்தில் இருக்கும் சாய் பிரணீத் 21-17, 21-14 என்ற நேர் செட்களில் இஸ்ரேலின் மிஷா ஜிஸ்பர்மேனை வீழ்த்தினார். மற்றொரு முதல் சுற்றில் போட்டித் தரவரிசையில் 4-ஆவது இடத்தில் இருக்கும் சமீர் வர்மா 13-21, 21-17, 21-12 என்ற செட்களில் நியூஸிலாந்தின் அபினவ் மனோடாவை தோற்கடித்தார்.
இதையடுத்து 2-ஆவது சுற்றில் சாய் பிரணீத்-இந்தோனேஷியாவின் பான்ஜி அகமது மெளலானாவையும், சமீர் வர்மா -ஜப்பானின் டகுமா யுடாவையும் சந்திக்கின்றனர்.
இதர இந்திய வீரர்களான செளரவ் வர்மா, அஜய் ஜெயராம் ஆகியோர் முதல் சுற்றில் தோல்வி கண்டனர். இதில் செளரவ் வர்மா 21-19, 17-21, 12-21 என்ற செட்களில் ஜப்பானின் டகுமா யுடாவிடம் வீழ்ந்தார். அஜய் ஜெயராம் 22-20, 20-22, 17-21 என்ற செட்களில் ஜப்பானின் ரீச்சி டகெஷிடாவிடம் போராடி வீழ்ந்தார்.
பிரபல இந்தியர்களான சாய்னா நெவால், பி.வி.சிந்து பங்கேற்காத நிலையில், இப்போட்டியின் மகளிர் பிரிவில் களம் கண்டுள்ள இந்தியாவின் ஜக்கா வைஷ்ணவி ரெட்டி 19-21, 21-15, 21-15 என்ற செட்களில் இங்கிலாந்தின் ஜியார்ஜினா பிளான்டை வீழ்த்தி 2-ஆவது சுற்றுக்கு முன்னேறினார்.
ஆடவர் இரட்டையர் பிரிவில் மானு அத்ரி/சுமீத் ரெட்டி இணை தனது முதல் சுற்றில் 21-11, 21-10 என்ற செட்களில் ஆஸ்திரேலியாவின் லுகாஸ் டெஃபோல்கி/மிக்கெல் ஃபாரிமான் இணையை வீழ்த்தியது. மற்றொரு இந்திய ஜோடியான அர்ஜூன்/ராமச்சந்திரன் 21-7, 21-15 என்ற செட்களில் ஆஸ்திரேலியாவின் ரேமன்ட் டாம்/எரிக் வோங் ஜோடியை வீழ்த்தி 2-ஆவது சுற்றுக்கு முன்னேறியது.
மகளிர் இரட்டையர் பிரிவில் இந்தியாவின் மேகனா ஜகம்புடி/பூர்விஷா ராம் இணை முதல் சுற்றில் 21-10, 21-16 என்ற செட்களில் ஆஸ்திரேலியாவின் மேகி சான்-ஜோடீ வேகா இணையை வென்றது.