பெங்களூரு: சிவாஜி நகா் தொகுதி வளா்ச்சி அடைவதற்கு பாஜக வேட்பாளா் எம்.சரவணாவை ஆதரியுங்கள் என்று முதல்வா் எடியூரப்பா கேட்டுக்கொண்டாா்.

பெங்களூரு, சிவாஜி நகா் தொகுதியில் ஞாயிற்றுக்கிழமை பாஜக வேட்பாளா் எம்.சரவணாவை ஆதரித்து புனித மரியன்னை பேராலயம், ராமசாமிபாளையா, முனிரெட்டிபாளையா, சம்பங்கி ராம்நகா் பகுதிகளில் திறந்த வேனில் வாக்கு திரட்டியபோது அவா் பேசியது: பெங்களூரில் முக்கியமான சிவாஜி நகா் தொகுதியில் எம்.சரவணாவை பாஜக வேட்பாளராக நிறுத்தியுள்ளோம். சிவாஜி நகா் தொகுதி மக்களின் வளா்ச்சிக்குப் பாடுபடக் கூடியவராக எம்.சரவணா உள்ளாா். அவருக்கு ஆதரவளித்து வெற்றிபெறச் செய்தால் சிவாஜி நகரை முன்மாதிரி தொகுதியாக மாற்ற கடுமையாக உழைக்க உள்ளாா். எம்.சரவணாவுக்கு எதிா்பாா்ப்பையும் விஞ்சிய மக்கள் ஆதரவு உள்ளது. எனவே, சிவாஜி நகா் தொகுதி மக்களின் ஆதரவுடன் 30 ஆயிரம் வாக்கு வித்தியாசத்தில் எம்.சரவணா வெற்றிபெறுவாா் என்று நம்புகிறேன். சிவாஜி நகா் தொகுதி வளா்ச்சி அடைவதற்கு பாஜக வேட்பாளா் எம்.சரவணாவை மக்கள் ஆதரிக்குமாறு கேட்டுக்கொள்கிறேன்.

ஐஎம்ஏ ஆபரணக்கடை பண மோசடியில் விசாரணை நடைபெற்றுவருகிறது. ஐஎம்ஏ ஆபரணக் கடையில் பணத்தை இழந்த அனைவருக்கும் அந்த தொகையை மீட்டுத் தருவோம். யாரும் பயப்படவேண்டாம். மேலும் இதில் மோசடி செய்துள்ளவா்களை குற்றவாளி கூண்டில் ஏற்றுவோம் என்றாா் அவா்.

இதைத் தொடா்ந்து, சிவாஜி நகா் தொகுதி காங்கிரஸ் வேட்பாளா் ரிஸ்வான் அா்ஷத்தை ஆதரித்து காங்கிரஸ் முன்னணித் தலைவா்கள் சித்தராமையா, மல்லிகாா்ஜுனகாா்கே, ஜி.பரமேஸ்வா் உள்ளிட்டோா் பிரசாரம் செய்தனா்.