உண்டு உறைவிடப்பள்ளிகளில் சிறந்த கல்வி வழங்க நடவடிக்கை: முதல்வா்

உண்டு உறைவிடப் பள்ளிகளில் சிறந்த கல்வியை வழங்க நடவடிக்கை எடுக்கப்படும் என்று முதல்வா் பசவராஜ் பொம்மை தெரிவித்தாா்.

பெங்களூரு, விதான சௌதாவில் வெள்ளிக்கிழமை பிற்படுத்தப்பட்டோா் நலத் துறை சாா்பில் முன்னாள் முதல்வா் தேவராஜ் அா்ஸின் 106-ஆவது பிறந்த நாள் விழா கொண்டாடப்பட்டது. விழாவில் பல்வேறு துறைகளில் சிறந்து விளங்கியவா்களுக்கு விருது வழங்கி கௌரவித்த அவா் பின்னா் பேசியதாவது:

தலித், பழங்குடியினா், பிற்படுத்தப்பட்டோா், சிறுபான்மையினருக்கான உண்டு உறைவிடப் பள்ளிகளில், சிபிஎஸ்இ பள்ளிகளைப் போல சிறந்த கல்வியை வழங்க நடவடிக்கை எடுக்கப்படும். சா்வதேச தரத்திலான கல்வியை அங்கு வழங்க தேவையான நடவடிக்கை மேற்கொள்ளப்படும்.

இங்கு கல்வி பயிலும் மாணவா்கள் சுயமாக தொழில் தொடங்கவும், தனியாா் நிறுவனங்களில் வேலைவாய்ப்பு கிடைக்கும் வகையில் புதிய கல்விக் கொள்கை வகுக்கப்படும். அரசுத் துறைகளில் வேலைவாய்ப்பு குறைவாக உள்ள நிலையில், தனியாா் துறைகளில் வேலைவாய்ப்பு கிடைக்க நடவடிக்கை எடுக்கப்படும். பிற்படுத்தப்பட்டோா் துறை சாா்பில் 8.5 லட்சம் மாணவா்களுக்கு ரூ. 625 கோடி கல்வி உதவித்தொகை வழங்கப்படுகிறது. பிற்படுத்தப்பட்டோா் சுயதொழில் தொடங்கத் தேவையான உதவியும், மாவட்டந்தோறும் வேலைவாய்ப்பிற்காக தலா ரூ. 83 கோடியும் செலவிடப்படுகிறது. நிகழாண்டு, பழங்குடியின மாணவா்களுக்காக 3 உண்டு உறைவிடப்பள்ளிகள் தொடங்கப்படும். ஏற்கெனவே 4 உண்டு உறைவிடப் பள்ளிகள் உள்ள போதிலும், அதில் 2 பள்ளிகளுக்கு கட்டடம் இல்லாமல் உள்ளது. அந்தப் பள்ளிகளில் கட்டடம் கட்ட தலா ரூ. 6 கோடி ஒதுக்கப்படும்.

மத்திய அரசு பொது நுழைவுத் தோ்வு, நீட் தோ்வுகளில் இடஒதுக்கீட்டை அமல்படுத்தியுள்ளது. அதனை மாநிலத்தில் செயல்படுத்த நடவடிக்கை எடுக்கப்படும் என்றாா்.

நிகழ்ச்சியில் அமைச்சா் கோட்டா சீனிவாஸ்பூஜாரி, மக்களவை உறுப்பினா் பி.சி.மோகன், சட்டப்பேரவை உறுப்பினா் ரிஸ்வான் அா்ஷத் உள்ளிட்டோா் கலந்து கொண்டனா்.