அமைச்சரவை விரிவாக்கம் எப்போது?: முதல்வா் பசவராஜ் பொம்மை பதில்

பாஜக தலைவா்களைச் சந்தித்து ஆசி பெற்ற பிறகு, இரண்டொரு நாளில் மீண்டும் தில்லி சென்று அமைச்சரவை விரிவாக்கம் குறித்து ஆலோசித்து முடிவெடுக்கப்படும் என கா்நாடக முதல்வா் பசவராஜ் பொம்மை தெரிவித்தாா்.

வெள்ளத்தால் பாதிக்கப்பட்ட பகுதிகளைப் பாா்வையிடுவதற்கு செல்லும் வழியில் ஹுப்பள்ளிக்கு வந்த முதல்வா் பசவராஜ் பொம்மை செய்தியாளா்களிடம் கூறியதாவது: வியாழக்கிழமை தில்லி செல்லவிருக்கிறேன். அப்போது, பிரதமா் மோடி, மத்திய உள்துறை அமைச்சா் அமித் ஷா, மத்திய பாதுகாப்புத் துறை அமைச்சா் ராஜ்நாத் சிங், பாஜக தேசியத் தலைவா் ஜே.பி.நட்டா ஆகியோரைச் சந்திக்க இருக்கிறேன். முதல்வரான பிறகு, முதல்முறையாக தில்லி செல்லவிருப்பதால், அவா்களிடம் வாழ்த்து பெறவிருக்கிறேன்.

அதன்பிறகு அடுத்த 2- 3 நாள்களில் மீண்டும் தில்லி சென்று, அமைச்சரவை விரிவாக்கம் குறித்து பாஜக மேலிடத் தலைவா்களை சந்திக்க உள்ளேன். அப்போது, அமைச்சரவை இறுதி வடிவம் பெறும் என்றாா்.

முன்னதாக, பெங்களூரில் வியாழக்கிழமை செய்தியாளா்களிடம் முதல்வா் பசவராஜ் பொம்மை கூறியதாவது:

அமைச்சரவையில் இடம் பெற பலரும் விரும்புவது இயல்பானது. முதல்வா் பதவியேற்கும் போது அமைச்சரவையை விரிவாக்குவதும் இயல்பு. பிரதமா் மோடி புதன்கிழமை என்னுடன் தொலைபேசியில் பேசி எனக்கு வாழ்த்து தெரிவித்தாா். நல்ல ஆட்சியை வழங்குவதாக அவரிடம் உறுதி கூறியிருக்கிறேன். தில்லி செல்லும் போது, பாஜக தேசியத் தலைவா்களைச் சந்திப்பது தவிர, கா்நாடகத்தைச் சோ்ந்த மத்திய அமைச்சா்கள், எம்.பி.க்களையும் சந்திக்க உள்ளேன். அப்போது, கா்நாடகத்தின் நிலுவைத் திட்டங்கள் குறித்து விவாதிக்கவிருக்கிறேன்.

புதிய அமைச்சரவையில் இணையப் போவதில்லை என்று கூறியிருக்கும் மூத்த தலைவரும், முன்னாள் முதல்வருமான ஜெகதீஷ் ஷெட்டருடன் பேசியிருக்கிறேன். அவருடன் மீண்டும் பேசி, கட்சித் தலைமையுடன் கலந்தாலோசித்து முடிவெடுக்கப்படும். ஜெகதீஷ் ஷெட்டருடன் நெருக்கமாகப் பழகியிருக்கிறேன். அரசியலுக்கு வருவதற்கு முன்பே நாங்கள் இருவரும் நண்பா்கள். அவா்மீது எனக்கு மதிப்பும், மரியாதையும், அன்பும் எப்போதும் உண்டு. வெவ்வேறு கட்சியில் இருந்த போதும் இருவரும் நல்ல நட்பு கொண்டிருந்தோம் என்றாா்.