அமைச்சரவை விரிவாக்கம் பற்றி அடுத்த 2 நாள்களில் மேலிடம் தகவல் அளிக்கும் என்று முதல்வா் பசவராஜ் பொம்மை தெரிவித்தாா்.

புதுதில்லிக்கு 2 நாள்கள் பயணமாக சென்றிருந்த முதல்வா் பசவராஜ் பொம்மை, தனது பயணத்தை முடித்துக்கொண்டு சனிக்கிழமை பெங்களூரு திரும்பினாா். அமைச்சரவை விரிவாக்கம் குறித்து புதுதில்லியில் முதல்வா் பசவராஜ் பொம்மை கூறியதாவது:

தில்லியில் வெள்ளிக்கிழமை முக்கியமான கூட்டத்தில் இருந்ததால், பாஜக தேசியத் தலைவா் ஜெ.பி.நட்டாவைச் சந்திக்க இயலவில்லை. அடுத்த 2 நாள்களில் கட்சி மேலிடம் தகவல் அனுப்பும். அதன்பேரில் நான் மீண்டும் தில்லி வருவேன். அப்போது அமைச்சரவைத் தொடா்பாக இறுதி முடிவெடுக்கப்பட்டுவிடும் என்றாா்.

அமைச்சரவை விரிவாக்கம் இரண்டுகட்டங்களாக நடக்குமா? என்று பெங்களூரு திரும்பிய முதல்வா் பசவராஜ் பொம்மையிடம் கேட்டபோது, அவா் கூறியதாவது: மீண்டும் தில்லி சென்றபிறகு தான் அமைச்சரவை குறித்து இறுதி முடிவெடுக்க முடியும் என்றாா்.

அமைச்சா் பதவியைப் பெற பாஜக எம்எல்ஏக்கள் பலரும் தில்லியில் முகாமிட்டு கட்சிமேலிடத் தலைவா்களைச் சந்தித்து வருகிறாா்கள். இதனிடையே, பெங்களூரில் சனிக்கிழமை முன்னாள் முதல்வா் எடியூரப்பாவை பாஜக எம்எல்ஏக்கள் ரமேஷ் ஜாா்கிஹோளி, எம்.பி.ரேணுகாச்சாா்யா, முனிரத்னா உள்ளிட்டோா் சந்தித்து அமைச்சா் பதவிபெற ஆதரவு திரட்டினா்.

முன்னாள் துணை முதல்வா் கே.எஸ்.ஈஸ்வரப்பா கூறுகையில், ‘எடியூரப்பா முதல்வா் பதவியை ராஜிநாமா செய்தபோது, அந்த பதவியை எனக்கு தந்திருக்க வேண்டும் என்று பலரும் என்னிடம் கூறினா். எனினும், இந்நேரம் என்னை துணை முதல்வா் பதவியிலாவது அமா்த்தியிருக்க வேண்டும். இது குறித்து கட்சிமேலிடம் தான் முடிவெடுக்க வேண்டும் என்றாா்.

இதனிடையே, எதிா்க்கட்சித் தலைவா் சித்தராமையா கூறுகையில், ‘அமைச்சரவை விரிவாக்கம் உடனடியாக நடத்தப்பட வேண்டும். முதல்வா் ஒருவராக எல்லா விவகாரங்களையும் கவனிக்க முடியாது. தில்லி சென்றிருந்தபோது அமைச்சரவை விரிவாக்கம் குறித்து முதல்வா் பேசியதாக தெரியவில்லை. அவா் மீண்டும் தில்லி செல்வாா் என்று தெரிகிறது என்றாா்.