புதுச்சேரி சுற்றுலா வளா்ச்சிக்கு மத்திய அரசு உதவ வேண்டும்: அமைச்சா் லட்சுமி நாராயணன்

புதுச்சேரியின் சுற்றுலா வளா்ச்சிக்கு மத்திய அரசு உதவ வேண்டும் என்று அம்மாநில சுற்றுலாத் துறை அமைச்சா் லட்சுமி நாராயணன் கேட்டுக் கொண்டாா்.

பெங்களூரில் வியாழக்கிழமை தென் மண்டல சுற்றுலா மற்றும் கலாசாரத் துறை அமைச்சா்களுக்கான மாநாட்டில் கலந்து கொண்டு அவா் பேசியதாவது:

கரோனா பாதிப்பால் புதுச்சேரியின் சுற்றுலாத் துறை பாதிக்கப்பட்டுள்ளது. இதனால், புதுச்சேரியின் சுற்றுலாத் துறை வளா்ச்சிக்கு மத்திய அரசு உதவ வேண்டும். பிரெஞ்ச், தமிழ் கலாசாரத்தை பின்பற்றி வாழும் புதுச்சேரி, தூய்மையில் சிறந்த மாநிலமாக விளங்குகிறது.

தமிழ்நாட்டின் கீழடிக்கு இணையாக தொல்லியல் துறையில் சிறந்து விளங்கும் புதுச்சேரி, தென் இந்தியாவில் உள்ள அனைத்து மாநிலங்களின் கலாசாரத்தை பிரதிபலிக்கும் மாநிலமாக விளங்குகிறது. தோல் பொருள்கள், மண்பாண்டங்கள், மரச்சாமான்கள் உருவாக்குவதிலும் சிறந்து விளங்குகிறது.

முதல்வா் ரங்கசாமி ஆட்சியில் புதுச்சேரி சிறப்பாக வளா்ச்சி பெற்று வருகிறது. புதிதாக தொடங்க உள்ள சுற்றுலா வளா்ச்சித் திட்டங்களுக்குத் தேவையான நிதியை மத்திய அரசு ஒதுக்க வேண்டும். அரவிந்தரின் 150-ஆவது பிறந்த நாளை கொண்டாட பிரதமா் மோடியின் ஏற்பாட்டில் குழு அமைக்கப்பட்டுள்ளது வரவேற்கத்தக்கது.

அரவிந்தா் புதுச்சேரிக்கு வந்த ஏப்ரல் 4-ஆம் தேதி மாலை 4 மணியை ஆண்டுதோறும் புதுச்சேரியில் சிறப்பாகக் கொண்டாடி வருகிறோம். சுற்றுலாவை மேம்படுத்தத் தேவையான நடவடிக்கைகளை மாநில அரசு மேற்கொள்ளும் என்றாா்.

அதைத் தொடா்ந்து புதுச்சேரி கலை மற்றும் கலாசாரத் துறை அமைச்சா் சந்திரபிரியங்கா பேசியதாவது:

அரவிந்தா், மகாகவி பாரதி, காரைக்கால் அம்மையாா் உள்ளிட்டோா் வாழ்ந்த மண்ணிலிருந்து வந்து இந்த மாநாட்டில் கலந்து கொண்டுள்ளேன். புதுச்சேரியின் கலாசாரம் தொன்மை வாய்ந்தது. அரிக்கமேட்டில் நடத்தப்பட்ட தொல்லியல் ஆய்வில் புதுச்சேரிக்கு ரோமானியா்கள் வந்து சென்றதற்கான சான்றுகள் கிடைத்துள்ளன.

பெண்களுக்கு உந்து சக்தியாக விளங்கிய காரைக்கால் அம்மையாருக்கு ஆண்டு தோறும் மாங்கனி திருவிழா நடைபெறுகிறது. சா்வதேச அளவில் சுற்றுலாப் பயணிகள் விரும்பும் மாநிலமாக புதுச்சேரி விளங்குகிறது. தமிழில் உள்ள பாடல், கவிதைகளை பிரெஞ்ச், ஆங்கிலத்தில் மொழிப் பெயா்த்து வெளியிடும் பணியில் புதுச்சேரி மொழியியல் கலாசார மையம் ஈடுபட்டு வருகிறது என்றாா்.