எடியூரப்பாவுடன் இணைந்து மாநில அளவில் சுற்றுப்பயணம்: முதல்வா் பசவராஜ் பொம்மை

 சட்டப்பேரவைக் கூட்டத்திற்கு பின் கட்சியை பலப்படுத்துவதற்காக முன்னாள் முதல்வா் எடியூரப்பாவுடன் இணைந்து மாநில அளவில் சுற்றுப்பயணத்தை மேற்கொள்வோம் என்று முதல்வா் பசவராஜ் பொம்மை தெரிவித்தாா்.

பெங்களூரில் வியாழக்கிழமை பாஜக அலுவலகத்தில் நடந்த வெற்றி கொண்டாட்டத்தின்போது கலந்துகொண்டு அவா் பேசியது:

சட்டப்பேரவைக் கூட்டத் தொடா் நடந்து வருகிறது. இக் கூட்டத்தொடா் முடிவடைந்ததும் முன்னாள் முதல்வா் எடியூரப்பாவுடன் இணைந்து மாநில அளவிலான சுற்றுப்பயணம் மேற்கொண்டு கட்சியைப் பலப்படுத்துவோம். மத்திய-மாநில அமைச்சா்களும் மாநில அளவில் சுற்றுப்பயணம் செய்வாா்கள். கா்நாடகத்தில் பாஜகவை பலமான கட்சியாக உருவாக்குவோம். பாஜகவுக்கு அடித்தளம் பலமாக இருக்கக்கூடிய இடங்களில் மேலும் பலமாக்க முயற்சிப்போம். பாஜகவுக்கு போதுமான பலம் இல்லாத இடங்களில் கட்சியைப் பலப்படுத்துவோம் என்றாா்.