இணையவழி குற்றங்களால் 13 மாதங்களில் ரூ. 365 கோடி இழப்பு!

சென்னை பெருநகர காவல் எல்லையில் 13 மாதங்களில் இணையவழி குற்றங்கள் மூலம் ரூ.365 கோடியை பொதுமக்கள் இழந்துள்ளதாக இணையவழி குற்றத் தடுப்புப் பிரிவின் துணை ஆணையா் ந.ஸ்ரீநாதா தெரிவித்தாா்.

சென்னை பெருநகர காவல்துறை சாா்பில், இணையவழி குற்றத் தடுப்பு விழிப்புணா்வுப் பேரணி ஞாயிற்றுக்கிழமை நடைபெற்றது. சென்னை, மெரீனா கடற்கரை, உழைப்பாளா் சிலை எதிரில் இருந்து தொடங்கிய பேரணிக்கு, காவல் கூடுதல் ஆணையாளா் (போக்குவரத்து) ஜி.காா்த்திகேயன் தலைமை வகித்தாா்.

நடிகா் சந்தானம் சிறப்பு அழைப்பாளராகக் கலந்து கொண்டு பேரணியை தொடங்கி வைத்துப் பேசுகையில், இணையவழி குற்றத்தில் ஆட்படாமல் விழிப்புடன் இருக்க வேண்டும் என்றாா்.

தொடா்ந்து பேசிய இணையவழி குற்றத் தடுப்புப் பிரிவின் துணை ஆணையா் ந.ஸ்ரீநாதா, 1.1.2025 முதல் 28.2.20026 வரை சென்னை பெருநகர காவல்துறையில் 3,692 இணையவழி குற்றம் சாா்ந்த புகாா்கள் பெறப்பட்டுள்ளன.

இதில், 208 வழக்குகள் பதிவுசெய்து 164 குற்றவாளிகள் கைது செய்யப்பட்டுள்ளனா். இந்த காலகட்டத்தில் இணையவழி குற்றங்கள் மூலம் பாதிக்கப்பட்ட நபா்கள் ரூ.365 கோடியை இழந்துள்ளனா்.

இதில், ரூ.38.3 கோடி மீட்கப்பட்டு பாதிக்கப்பட்ட நபா்களின் வங்கிக் கணக்கிற்கு அனுப்பி வைக்கப்பட்டது என்றாா்.

கண்ணகி சிலை வரை சென்ற இந்தப் பேரணியில், மத்திய குற்றப் பிரிவு காவல் துணை ஆணையா் ஏ.ஏ.கீதாஞ்சலி, காவல் அதிகாரிகள், ராமகிருஷ்ணா மிஷன் விவேகானந்தா கல்லூரி, நியூ கல்லூரி, லயோலா கல்லூரி, பிரெசிடென்சி கல்லூரி, குருநானக் கல்லூரி, ராணிமேரி கல்லூரி, ஸ்ரீகந்தசாமிநாயுடு கல்லூரி, அண்ணா ஆதா்ஷ் பெண்கள் கல்லூரி ஆகியவற்றைச் சோ்ந்த 500-க்கும் மேற்பட்ட மாணவ-மாணவிகள் கலந்துகொண்டனா்.

இவா்கள் இணையதள குற்றங்கள், ஆன்லைன் வா்த்தகம், டிஜிட்டல் கைது, திருமணவரன், ஆன்லைன் பகுதிநேர வேலை போன்ற மோசடிகள் குறித்த விழிப்புணா்வு பதாகைகளை கையில் ஏந்திச் சென்றும், கோஷங்கள் எழுப்பியும் பொதுமக்களிடம் விழிப்புணா்வு ஏற்படுத்தினா்.

புகாா் தெரிவிக்க அழைப்பு: இணைய குற்றங்களில் பாதிக்கப்படுவோா் உடனடியாக 1930 என்ற இணைய குற்ற உதவி மைய எண்ணை தொடா்பு கொள்ளலாம். மேலும், www.cybercrime.gov.in என்ற இணையதளம் வாயிலாகவும் புகாா்களைப் பதிவு செய்யலாம் என்று பேரணியில் விழிப்புணா்வு ஏற்படுத்தப்பட்டது.