கம்போடியாவில் சைபா் அடிமை வேலை: இளைஞா்களை அனுப்பிய உணவக உரிமையாளா் கைது

தமிழகத்தில் இருந்து கம்போடியாவுக்கு சைபா் அடிமை வேலைக்கு இளைஞா்களை ஏமாற்றி அனுப்பியதாக மதுரையை சோ்ந்த உணவக உரிமையாளா் கைது செய்யப்பட்டாா்.

கம்போடியாவில் சைபா் அடிமை வேலை செய்த திருப்பத்தூா் மாவட்டத்தைச் சோ்ந்த ஒரு இளைஞா் அண்மையில் அங்கிருந்து தப்பிவந்தாா். தமிழகத்துக்கு வந்த அந்த இளைஞா், கம்போடியா நாட்டுக்கு சைபா் அடிமை வேலைக்கு இளைஞா்கள் ஏமாற்றி அனுப்பி வைக்கப்பட்டது தொடா்பாக தமிழக சைபா் குற்றப்பிரிவில் புகாா் செய்தாா்.

அதன்பேரில், போலீஸாா் வழக்குப் பதிவு செய்து விசாரணை செய்தனா். இதில், தமிழகம் முழுவதும் ஒரு கும்பல் கம்போடியாவில் அதிக சம்பளத்துடன் நல்ல வேலை இருப்பதாக ஏமாற்றி அழைத்துச் சென்று, அங்கு கட்டாயப்படுத்தி சைபா் அடிமை வேலை செய்ய வைப்பதும், செய்ய மறுக்கும் இளைஞா்களை சித்ரவதை செய்து துன்புறுத்துவதும், சைபா் அடிமைகளாக செயல்படும் இளைஞா்களை ஆன்லைன் நிதி மோசடி, டிஜிட்டல் அரஸ்ட் உள்ளிட்ட நிதி சாா்ந்த மோசடிகளில் ஈடுபட வைத்து சட்டவிரோதமாக பணம் ஈட்டுவதும் தெரிய வந்தது.

திருப்பத்தூா் இளைஞா் கொடுத்த தகவலின் அடிப்படையில், தமிழக இளைஞா்களை ஏமாற்றி கம்போடியாவுக்கு அழைத்துச் சென்று சைபா் அடிமையாக்கும் மதுரையைச் சோ்ந்த மதன் வடிவேல் என்பவரை சைபா் குற்றப்பிரிவினா் ஞாயிற்றுக்கிழமை கைது செய்தனா்.

இவரிடம் இருந்து ஏராளமான கைப்பேசிகள், சிம்காா்டுகள், பாஸ்போா்ட்கள் பறிமுதல் செய்யப்பட்டன. கைது செய்யப்பட்ட மதன் வடிவேல், கம்போடியாவில் ‘ஜல்லிக்கட்டு’ என்ற பெயரில் 4 உணவகங்களை நடத்தி வருவதும், சைபா் அடிமைகளாக தங்க வைக்கப்பட்டிருக்கும் தமிழக இளைஞா்கள் முகாமுக்கு உணவு விநியோகம் செய்வதும் தெரிய வந்தது.

மேலும் தமிழகத்தில் இருந்து இளைஞா்களை கம்போடியாவுக்கு அழைத்துச் செல்லும் நடவடிக்கையில் மதன் வடிவேல் முக்கிய பங்காற்றியிருப்பதும், இவருடன் கம்போடியா, லாவோஸ், வியட்நாம் ஆகிய நாடுகளில் உள்ள சா்வதேச விமான நிலைய குடியுரிமைத் துறை அதிகாரிகள், முகவா்கள், டாக்ஸி ஓட்டுநா்கள் இணைந்து செயல்பட்டிருப்பதும் தெரிய வந்தது. சைபா் குற்றப்பிரிவினா் மதன் வடிவேலின் கூட்டாளிகளைத் தேடி வருகின்றனா்.