சென்னை: வருமானத்திற்கு அதிகமாக சொத்து சோ்த்த வழக்கில் இந்திய உணவு கழக முன்னாள் துணைப் பொது மேலாளா், அவரது மனைவிக்கு தலா மூன்றாண்டுகள் சிறை தண்டனை விதித்து சிபிஐ நீதிமன்றம் தீா்ப்பளித்துள்ளது.

சென்னையில் உள்ள இந்திய உணவு கழகத்தில் துணைப் பொது மேலாளராகப் பணியாற்றியவா் துரைராஜ். கடந்த 2009-இல் லஞ்ச புகாா் காரணமாக, இவா் மீது சிபிஐ போலீஸாா் வழக்குப்பதிவு செய்தனா். லஞ்சப் பணத்தில் ஏராளமான சொத்துகளை துரைராஜ், மனைவி சாருமதி வாங்கி குவித்தது அமலாக்கத்துறைக்கு தெரியவந்தது.

அமலாக்கத்துறை விசாரணையில் கடந்த 2002 ஜனவரி 1 முதல் 2009 -ஆம் ஆண்டு செப்டம்பா் 30 வரை இவா் பணியில் இருந்த காலத்தில் ரூ.54 லட்சத்து 98 ஆயிரத்து 969-ஐ வருமானத்துக்கு அதிகமாக குவித்தது தெரியவந்தது.

இதைத்தொடா்ந்து சட்டவிரோத பணப் பரிமாற்ற தடை சட்டத்தின் கீழ் துரைராஜ், அவரது மனைவி சாருமதி ஆகியோா் மீது அமலாக்கத்துறை அதிகாரிகள் தனியாக வழக்குப்பதிவு செய்தனா்.

இந்த வழக்கு விசாரணை சென்னை சிபிஐ நீதிமன்றத்தில் நீதிபதி மலா்வாலன்டினா முன்பு நடந்து வந்தது. வழக்கை விசாரித்த நீதிபதி, துரைராஜ், அவரது மனைவி சாருமதி ஆகியோருக்கு மூன்றாண்டுகள் சிறை தண்டனை, தலா ரூ.25,000 அபராதம் விதித்து தீா்ப்பளித்தாா்.

மேலும், சட்டவிரோதமாகப் பெற்ற பணத்தின் மூலம் சோ்த்த சொத்துகளை அரசுடைமையாக்க அமலாக்கத்துறை அதிகாரிகள் உரிய சட்ட நடவடிக்கை எடுக்க வேண்டுமென்று உத்தரவிட்டாா்.