மாம்பலம் பிரதான சாலையில் மெட்ரோ ரயில் பணிகள் நடைபெற உள்ளதால் திங்கள்கிழமை (ஜன .9) முதல் 15 மாதங்களுக்கு போக்குவரத்து மாற்றம் செய்யப்பட்டுள்ளது.

அதன்படி, மாம்பலம் பிரதான சாலையில், தியாகராய கிராமணி சாலை சந்திப்பு முதல் ஹபிபுல்லா சாலை சந்திப்பு வரை போக்குவரத்து தடை செய்யப்பட்டுள்ளது.

மாம்பலம் பிரதான சாலையில் இருந்து கோடம்பாக்கம் மேம்பாலம் பக்கம் செல்ல விரும்பும் இலகு ரக வாகனங்கள் தியாகராய கிராமணி சாலை சந்திப்பில் தடை செய்யப்பட்டு, தியாகராய சாலை, வடக்கு உஸ்மான் சாலை மற்றும் ஹபிபுல்லா சாலை வழியாகவும் செல்லலாம்.

மாம்பலம் பிரதான சாலையில் கோடம்பாக்கம் மேம்பாலம் பக்கத்தில் இருந்து தியாகராய நகா் பக்கம் செல்ல விரும்பும் இலகு ரக வாகனங்கள், ஹபிபுல்லா சாலை சந்திப்பில் தடைசெய்யப்பட்டு, ஹபிபுல்லா சாலை மற்றும் வடக்கு உஸ்மான் சாலை வழியாகவும் செல்லலாம்.

இந்த போக்குவரத்து மாற்றம் திங்கள்கிழமை முதல் அடுத்த ஆண்டு மாா்ச் 4-ஆம் தேதி வரை தொடரும் என தெரிவிக்கப்பட்டுள்ளது.