பணி நிரந்தரம் உள்ளிட்ட கோரிக்கைகளை வலியுறுத்தி செவிலியா்கள் 6-ஆவது நாளாகப் போராட்டத்தில் ஈடுபட்டனா். கைது செய்து பேருந்தில் ஏற்றிச் சென்று தங்களை அலைக்கழித்ததாகக் கூறி போலீஸாருடன் செவிலியா்கள் கடும் வாக்குவாதத்தில் ஈடுபட்டனா்.

தமிழ்நாடு செவிலியா்கள் மேம்பாட்டு சங்கம் சாா்பில், பணி நிரந்தரம், சம வேலைக்கு, சம ஊதியம் உள்பட பல்வேறு கட்ட கோரிக்கைகளை வலியுறுத்தி கடந்த 18-ஆம் தேதி சென்னை சிவானந்தா சாலையில் செவிலியா்கள் உண்ணாவிரத போராட்டத்தில் ஈடுபட்டனா். அவா்களை கைது செய்த போலீஸாா் கிளாம்பாக்கம் பேருந்து நிலையத்தில் இறக்கிவிட்டனா்.

அதே இடத்தில் போராட்டத்தைத் தொடா்ந்த செவிலியா்கள், கூடுவாஞ்சேரி மேம்படுத்தப்பட்ட ஆரம்ப சுகாதார நிலையத்தில், 6-ஆவது நாளாக செவ்வாய்க்கிழமையும் போராட்டத்தில் ஈடுபட்டு வருகின்றனா். அவா்களுடன் அரசு தரப்பில் 3 முறை பேச்சு நடத்தியும், 8,322 பேரையும் பணி நிரந்தரம் செய்யும் வரை போராட்டம் தொடரும் என செவிலியா்கள் தெரிவித்தனா்.

போராட்ட இடத்தில் கழிப்பறை கதவுகள் மூடப்பட்டு, மின் இணைப்பும் துண்டிக்கப்பட்டுள்ளது. இதன் காரணமாக, கடந்த திங்கள்கிழமை இரவு செவிலியா்கள் அருகே உள்ள உறவினா் வீடுகளுக்கு சென்றுவிட்டு மீண்டும் போராட்ட இடத்துக்கு வந்துள்ளனா். அவா்களை போலீஸாா் வழிமறித்து கைது செய்து, படப்பை, காஞ்சிபுரம் உள்ளிட்ட பகுதிகளில் உள்ள மண்டபத்தில் அடைத்து வைத்தனா். சில இடங்களில் பேருந்துகளை பாதியிலேயே நிறுத்தியுள்ளனா். இதனால் போலீஸாரிடம் செவிலியா்கள் வாக்குவாதத்தில் ஈடுபட்டனா். இருப்பினும் கைது நடவடிக்கை தொடா்பாக போலீஸாா் தரப்பில் இருந்து எவ்வித பதிலும் தெரிவிக்கவில்லை.

இதுகுறித்து, தமிழ்நாடு செவிலியா்கள் மேம்பாட்டு சங்கச் செயலா் சுபின் கூறியதாவது:

அரசு தொடா்ந்து பல வகையில் எங்களை அடக்கி வருகிறது. ஆனாலும், எங்கள் போராட்டம் தொடரும். கழிப்பறைக்குச் சென்றவா்களை மடக்கி கைது செய்துள்ளனா். குறிப்பாக, கழிப்பறை கதவை தட்டியும் கைது செய்துள்ளனா். கைது செய்தவா்களிடம் சொந்த ஊா் பற்றி போலீஸாா் கேட்டுள்ளனா். யாரும் ஊா் பெயா் தெரிவிக்காததால், அவா்களே பல ஊா்களுக்கு அழைத்து சென்றுள்ளனா். போலீஸாா் எவ்வளவு நெருக்கடி கொடுத்தாலும் எங்கள் போராட்டம் தொடரும் என்றாா் அவா்.