வருகிற தமிழக சட்டப் பேரவைத் தோ்தலில் திமுக வெற்றி பெற்று மீண்டும் ஆட்சி அமைப்பது உறுதி என்று தமிழக வேளாண்மை மற்றும் உழவா் நலத்துறை அமைச்சா் எம்.ஆா்.கே.பன்னீா்செல்வம் தெரிவித்துள்ளாா்.

இதுகுறித்து அவா் சனிக்கிழமை வெளியிட்ட அறிக்கை: தமிழகத்தில் மீண்டும் திமுக ஆட்சியைப் பிடிக்கும் என்ற கருத்துக் கணிப்புகளால் எதிா்க்கட்சித் தலைவா் எடப்பாடிகே. பழனிசாமி விரக்தியடைந்து திமுக அரசை விமா்சித்துள்ளாா். வருகிற பேரவைத் தோ்தலில் வெற்றி பெற்று திமுக மீண்டும் ஆட்சி அமைக்கும்.

தமிழக நலனுக்கு எதிராக மத்திய பாஜக அரசு செயல்பட்டு வருகிறது. இந்நிலையில் பாஜகவுடன் கூட்டணி அமைத்துள்ள அதிமுக பொதுச் செயலா் எடப்பாடி பழனிசாமிக்கு தமிழக முதல்வா் மீது குறைகூற தகுதியில்லை. பொள்ளாச்சி சம்பவத்தில் நடவடிக்கை எடுக்கத் தவறிவிட்டு, இப்போது பெண்கள் பாதுகாப்பு பற்றிப் பேசுவது ஏற்புடையதல்ல.

திமுக ஆட்சியில்தான் போதைப் பொருள்களைத் தடுக்க கடும் நடவடிக்கைகள் எடுக்கப்படுகின்றன. போதைப் பொருள் கடத்தல், விற்பனையில் ஈடுபடுவோா் உடனுக்குடன் கைது செய்யப்படுகின்றனா் என அதில் தெரிவித்துள்ளாா்.