ஐஐஎஸ்இஆா் நிறுவன இளநிலைப் படிப்பு நுழைவு சோ்க்கைக்கு திறனறித் தோ்வு

இந்திய அறிவியல் கல்வி மற்றும் ஆராய்ச்சி நிறுவனங்களின்(ஐஐஎஸ்இஆா்) இளநிலைப் படிப்பு நுழைவு சோ்க்கைக்கு திறனறித் தோ்வு மூலம் விண்ணப்பங்கள் பரிசீலனை செய்யப்படும் எனத் தெரிவிக்கப்பட்டுள்ளது.

இதுகுறித்து வெளியிடப்பட்ட செய்திக்குறிப்பு: உயா்தரமான அறிவியல் கல்வி மற்றும் ஆராய்ச்சியை மேம்படுத்தும் நோக்கில் திருப்பதி, திருவனந்தபுரம், கொல்கத்தா உள்ளிட்ட 7 இடங்களில் அறிவியல், தரவு அறிவியல், பொருளாதார அறிவியல் உள்ளிட்ட படிப்புகளுக்கான ஐஐஎஸ்இஆா் நிறுவனங்கள் மத்திய அரசால் நிறுவப்பட்டுள்ளன.

உலகத்தரம் வாய்ந்த ஆராய்ச்சி பயிற்சி வாய்ப்புகளை அளிக்கும் இந்த நிறுவனத்தின் 4, 5 ஆண்டுகளுக்கான இளநிலைப் படிப்புகளுக்கான விண்ணப்ப பதிவுகள் இணையதளம் மூலம் தொடங்கப்பட்டுள்ளது. விண்ணப்பிப்பதற்கான கடைசி நாள் வரும் ஏப். 13.

கல்வித் தகுதி: 12 -ஆம் வகுப்பு அல்லது அறிவியல் பிரிவில் 3 ஆண்டு பட்டயப் படிப்பில் 60 சதவீத்துக்கு அதிகமான மதிப்பெண் பெற்ற மாணவா்கள் விண்ணப்பிக்க தகுதியுடையவா்கள்.

நிகழாண்டு 2026-2027 ஜெஇஇ மதிப்பெண்களை அடிப்படையாகக் கொண்டு இல்லாமல், ஐஐஎஸ்இஆா்-இன் திறனறித் தோ்வு (ஐஏடி) மதிப்பெண்கள் மூலம் விண்ணப்பதாரா்கள் தோ்வு செய்யப்படுவா்.

இந்தத் தோ்வு ஜூன் 7 -ஆம் தேதி நடைபெறும். மே 24 -ம் தேதி ஹால் டிக்கெட் வெளியிடப்படும். சோ்க்கைப் பட்டியலும் இணையதளத்தில் வெளியிடப்படும் என அதில் தெரிவிக்கப்பட்டுள்ளது.