திமுகவுக்கு எதிரான கண்டன ஆர்ப்பாட்டம் குறித்த அதிமுக மாவட்ட நிர்வாகிகள் ஆலோசனைக் கூட்டம் காஞ்சிபுரத்தில் வெள்ளிக்கிழமை நடைபெற்றது.
தமிழர்களுக்கு துரோகம் செய்தவர்கள் குறித்து பொதுமக்களுக்குத் தெரிவிக்கும் கண்டனப் பொதுக்கூட்டம், ஆர்ப்பாட்டம் ஆகிய போராட்டங்களை வரும் 25ஆம் தேதியன்று மாவட்டத் தலைநகரங்களில் நடத்த அதிமுக திட்டமிட்டுள்ளது. அதன்படி, காஞ்சிபுரம் மேற்கு மாவட்டச் செயலர் வாலாஜாபாத் பா.கணேசன் தலைமையில் நகரில் உள்ள தனியார் மண்டபம் ஒன்றில் மாவட்ட நிர்வாகிகள் ஆலோசனைக் கூட்டம் நடைபெற்றது. இக்கூட்டத்துக்கு, கிழக்கு மாவட்டச் செயலர் ச. ராஜேந்திரன், மத்திய மாவட்டச் செயலர் எஸ்.ஆறுமுகம் ஆகியோர் முன்னிலை வகித்தனர். 
கூட்டத்தில், அதிமுக அமைப்புச் செயலர்கள் வி.சோமசுந்தரம், மைதிலி திருநாவுக்கரசு, முன்னாள் அமைச்சர் டி.கே.எம்.சின்னையா உள்பட திரளானோர் கலந்து கொண்டனர்.