காஞ்சிபுரம் பேரறிஞா் அண்ணா கூட்டுறவு மேலாண்மை நிலையம் சிறந்த மேலாண்மை நிலையமாகத் தோ்வு செய்யப்பட்டதைத் தொடா்ந்து, அதன் நிா்வாகிகளை கூட்டுறவுச் சங்கங்களுக்கான இணைப் பதிவாளா் எஸ்.லெட்சுமி வெள்ளிக்கிழமை பாராட்டினாா்.

காஞ்சிபுரம் மாவட்ட ஆட்சியா் அலுவலக எதிா்ப்புறம் பேரறிஞா் அண்ணா கூட்டுறவு மேலாண்மை நிலையம் செயல்பட்டு வருகிறது. இது சிறந்த மேலாண்மை நிலையமாக அண்மையில் தோ்வு செய்யப்பட்டிருந்தது. இதற்கென தமிழக அரசு கேடயம் வழங்கியிருந்தது. இதையடுத்து, காஞ்சிபுரம் மண்டல கூட்டுறவு சங்கங்களுக்கான இணைப் பதிவாளா் எஸ்.லெட்சுமி மேலாண்மை நிலைய முதல்வா், விரிவுரையாளா்கள் மற்றும் பணியாளா்களை நேரில் அழைத்துப் பாராட்டினாா். மேலும், அரசு வழங்கிய கேடயத்தை இணைப் பதிவாளரிடம் காண்பித்து வாழ்த்துக்களைப் பெற்றனா்.