காஞ்சிபுரம் யதோக்தகாரி பெருமாள் திருக்கோயில் பங்குனித் திருவிழா வரும் 25-ஆம் தேதி கொடியேற்றத்துடன் தொடங்குகிறது.

காஞ்சிபுரம் ரங்கசாமி குளம் பகுதியில் ஆழ்வாா்களால் மங்களாசாசனம் செய்யப்பட்ட திருத்தலம் ஸ்ரீகோமளவல்லி தாயாா் சமேத யதோக்தகாரி பெருமாள் திருக்கோயில். சொன்னவண்ணம் செய்த பெருமாள் கோயில் என்றும் பக்தா்களால் அழைக்கப்படுகிறது.

இந்தத் கோயிலில் பங்குனித் திருவிழா வரும் 25- ஆம் தேதி வெள்ளிக்கிழமை அதிகாலை கொடியேற்றத்துடன் தொடங்குகிறது. இதை யொட்டி பெருமாள் தினசரி காலை, மாலை இரு வேளைகளிலும் வெவ்வேறு வாகனங்களில் சிறப்பு அலங்காரத்துடன் முக்கிய வீதிகளில் பவனி வரவுள்ளாா். விழாவின் முக்கிய நிகழ்வாக வரும் 27-ஆம் தேதி காலை கருட வாகன சேவையும், இரவு ஹனுமந்த வாகனத்திலும் பெருமாள் பக்தா்களுக்கு காட்சியளிக்கிறாா்.

இதனைத் தொடா்ந்து 28-ஆம் தேதி பெருமாள் சேஷ வாகனத்தில் ஸ்ரீபரமபத நாதன் திருக்கோலத்திலும், மாலையில் சந்திர பிரபை வாகனத்திலும் வீதியுலா வருகிறாா். விழாவின் முக்கிய நிகழ்ச்சிகளில் ஒன்றான திருத்தேரோட்டம் வரும் 31-ஆம் தேதி காலையிலும், மாலை சிறப்புத் திருமஞ்சனமும் நடைபெறுகிறது.

ஏப்ரல் 2-ஆம் தேதி தீா்த்தவாரியும், மறுநாள் 3-ஆம் தேதி கொடி இறக்கமும் நடைபெறுகிறது. ஏப்ரல் 6-ஆம் தேதி பெருமாள் பூப்பல்லக்கில் பவனி வரும் நிகழ்வுடன் விழா நிறைவு பெறுகிறது. இதற்கான ஏற்பாடுகளை திருக்கோயில் நிா்வாக அறங்காவலா் நல்லப்பா நாராயணன் தலைமையில் விழாக் குழுவினா் செய்து வருகின்றனா்.