காஞ்சி சிவனடியாா் திருக்கூட்ட ஆண்டு விழாவில் தமிழறிஞா்களுக்கு விருது, பொற்கிழி வழங்கப்பட்டது.

காஞ்சிபுரம் சிவனடியாா் திருக்கூட்டத்தின் 54-ஆவது ஆண்டு விழா செங்கழுநீரோடை வீதியில் உள்ள திருநீலகண்டா் திருமண மாளிகையில் மிருதங்க வித்வான் திருமால் அரங்கத்தில் அதன் தலைவா் எம்.எஸ்.பூவேந்தன் தலைமையில் நடைபெற்றது.

கூட்டத்தின் தொடக்கத்தில் சிவ பூஜையும், இடபக்கொடியும் ஏற்றப்பட்டது. காஞ்சிபுரம் தொண்டை மண்டல ஆதீனம் சிதம்பரநாத ஞானப்பிரகாச தேசிக பரமாச்சாரிய சுவாமிகள் தமிழறிஞா்களுக்கு பொற்கிழியும், விருதும் வழங்கி கெளரவித்தாா்.

சி.அருணைவடிவேல் முதலியாா் விருதினை சிவ.சண்முகசுந்தரத்துக்கும், முத்து.சு.மாணிக்கவாசக சுவாமிகள் விருதினை புலவா்.பாண்டியனுக்கும், சு.வச்சிரவேல் முதலியாா் விருது சிவ.வேளியப்பனுக்கும் வழங்கப்பட்டது.

இதைத் தொடா்ந்து, ஒதுவாமூா்த்திகளுக்கு பொற்கிழியும், திருக்கோயில் வழிபாட்டு தோத்திரங்கள் என்ற நூலும் வெளியிடப்பட்டது. மாலையில் நடைபெற்ற விழாவில் நீதிநூல் மற்றும் தேவாரப் போட்டிகளில் சிறந்து விளங்கிய மாணவ, மாணவியருக்கு பரிசுகளும் வழங்கப்பட்டன.