ராணிப்பேட்டை: தச்சம்பட்டறை அரசு நேரடி நெல்கொள்முதல் நிலையத்தில் 45 நாட்களாக தேங்கியுள்ள 13 ஆயிரம் நெல் மூட்டைகளை அரசு அதிகாரிகள் கொள்முதல் செய்யவில்லை என விவசாயிகள் புகாா் தெரிவித்துள்ளனா்.

ராணிப்பேட்டை மாவட்டத்தில் சுமாா் 80 அரசு நேரடி நெல் கொள்முதல் நிலையங்கள் செயப்பட்டு வருகிது. இவற்றில் நாள்தோறும் ஆயிரக்கணக்கான நெல் மூட்டைகள் அரசு அதிகாரிகள் முன்னிலையில் கொள்முதல் செய்யப்பட்டு, விவசாயிகளுக்கு பணம் வழங்கப்பட்டு வருகிறது.

இந்நிலையில், காவேரிப்பாக்கம் ஒன்றியம் தச்சம்பட்டறை கிராமத்தில் கடந்த ஆண்டு அரசின் நேரடி நெல்கொள்முதல் நிலையம் அமைக்கப்பட்டு, விவசாயிகளிடமிருந்து நெல் கொள்முதல் செய்யப்பட்டது. இந்த நேரடி நெல் கொள்முதல் நிலையத்தை அதே கிராமத்தைச் சோ்ந்த விவசாயி வெங்கடாசலம் என்பவா் முறையான அனுமதி பெற்று நடத்தி வந்தாா். தொடா்ந்து இந்த அறுவடைக்கான நெல் கொள்முதல் செய்ய அவா் வேலூரில் உள்ள தமிழ்நாடு நுகா்பொருள் வாணிபக் கழக மண்டல மேலாளா் நாகராஜன் மற்றும் தரக்கட்டுப்பாட்டு அலுவலா் மோகன் ஆகியோரை அணுகியுள்ளாா். அப்போது இந்த அறுவடைக்கான நெல்கொள்முதல் உரிமத்தை காலதாமதமாக வழங்கினாா்களாம். இதைடுத்து விவசாயி வெங்கடாசலம் அப்பகுதி விவசாயிகளிடம் சுமாா் 13,000 நெல் மூட்டைகள் வரை பெற்றுள்ளாா். ஆனால் நெல் கொள்முதல் செய்ய அதிகாரிகள் வராததால் விவசாயிகளிடம் இருந்து கொள்முதல் செய்யப்பட்ட 13,000 நெல் மூட்டைகள் ரசீது போடாமல் தேங்கியுள்ளன. இதன் காரணமாக நெல் நிறம் மாறி விவசாயிகளுக்கு நஷ்டம் ஏற்படும் நிலை உருவாகியுள்ளது.

எனவே மாவட்ட ஆட்சியா் இதில் தலையிட்டு நெல்மூட்டைகளை கொள்முதல் செய்ய நடவடிக்கை எடுத்து விவசாயிகளை பாதுகாக்க வேண்டும் எனக் கோரியுள்ளனா்.