ஆற்காடு நகராட்சியில் ரூ. 18 கோடி மதிப்பீட்டில் கால்வாய்கள் புனரமைக்கும் பணிகளை கைத்தறி மற்றும் துணி நூல் துறை அமைச்சா் ஆா்.காந்தி தொடங்கி வைத்தாா்.

நீா்வளத் துறை சாா்பில், ரூ.18 கோடி மதிப்பீட்டில் ஆற்காடு நகரப் பகுதியில் கிளைவ் பஜாா், தாஜ்புரா மற்றும் முப்பதுவெட்டி கால்வாய் புனரமைக்கும் பணி, ரூ. 5.73 கோடி மதிப்பீட்டில் பென்னகா் மடுவின் குறுக்கே தோனி மேடு அருகே தடுப்பணை அமைக்கும் பணி மற்றும் ரூ. 5 கோடி மதிப்பீட்டில் ஆற்காடு பாலாறு அணைக்கட்டிலிருந்து பிரியும் கலவைவாய்க்கால் புனரமைக்கும் பணிகள் தொடக்க விழா ஆற்காடு 70 அடி எம்.ஜி.ஆா். சாலையில் வியாழக்கிழமை நடைபெற்றது.

விழாவுக்கு, மாவட்ட ஆட்சியா் ஜெயு.சந்திரகலா தலைமை வகித்தாா். ஆற்காடு எம்எல்ஏ ஜெ.எல்.ஈஸ்வரப்பன், ஆற்காடு நகா்மன்றத் தலைவா் தேவிபென்ஸ்பாண்டியன், ஆற்காடு ஒன்றியக் குழுத் தலைவா் புவனேஸ்வரி சத்யநாதன் ஆகியோா் முன்னிலை வகித்தனா். அமைச்சா் ஆா்.காந்தி கலந்து கொண்டு புதிய திட்டப் பணிகளை தொடங்கி வைத்துப் பேசியதாவது:

ஆற்காடு நகரப் பகுதியில் கிளைவ் பஜாா் கால்வாய், தாஜ்புரா கால்வாய் மற்றும்முப்பதுவெட்டி கால்வாய்களை கசிவு காப்பீடு அமைக்கும் பணிக்கு முதல்வா் மு.க.ஸ்டாலின் ஒப்புதல் வழங்கி நிதி வழங்கியுள்ளாா். ஆற்காடு நகர மக்களின் 40 ஆண்டுகால கோரிக்கைக்கு தீா்வு காணப்படும் வகையில், கால்வாய் தூா்வாரப்படும் பணிகள் தொடங்கப்பட்டுள்ளது. நமது மாவட்டத்தில் அனைத்து நகராட்சிகளிலும் பொதுமக்களுக்கான பேருந்து நிலையம், சாலை வசதி, பூங்கா, வடிகால் வசதி உள்ளிட்ட அனைத்து வசதிகளும் நிறைவேற்றப்பட்டுள்ளது. ஆற்காடு சட்டப்பேரவை தொகுதியில் ஏராளமான பணிகள் செய்யப்பட்டு பொதுமக்களின் பயன்பாட்டுக்காக திறந்து வைக்கப்பட்டுள்ளது என்றாா் அவா்.

நிகழ்ச்சியில், நீா்வளத் துறை கண்காணிப்புப் பொறியாளா் பவழக் கண்ணன், ஆற்காடு நகா்மன்ற துணைத் தலைவா் பவளக்கொடி சரவணன், திமிரி ஒன்றியக் குழு தலைவா் எஸ்.அசோக், துணைத் தலைவா் ஜெ.ரமேஷ், செயற்பொறியாளா் வெங்கடேஷ், உதவி செயற்பொறியாளா் குமாா், நகா்மன்ற உறுப்பினா்கள், வியாபாரிகள் உள்ளிட்ட பலா் கலந்து கொண்டனா்.