அரக்கோணம்: பனப்பாக்கம் சிப்காட்டில் அமைக்கப்பட்டுள்ள டாடா மோட்டாா்ஸ் காா் உற்பத்தி தொழிற்சாலை திறப்பு விழா வரும் பிப். 9-ஆம் தேதி நடைபெற உள்ளநிலையில் ஏற்பாடுகளை அமைச்சா் ஆா்.காந்தி திங்கள்கிழமை ஆய்வு செய்தாா்.

நெமிலி வட்டம், பனப்பாக்கம் சிப்காட் தொழிற்சாலையில் டாடா மோட்டாா்ஸ் நிறுவனத்தின் காா் உற்பத்தி தொழிற்சாலை கட்டப்பட்டுள்ளது. வரும் 9-ஆம் தேதி திங்கள்கிழமை முதல்வா் மு.க.ஸ்டாலின் தொழிற்சாலையை திறந்து வைக்கிறாா்.

பாதுகாப்பு முன்னேற்பாட்டு பணிகள் குறித்து கைத்தறி மற்றும் துணிநூல் துறை அமைச்சா் ஆா்.காந்தி ஆய்வு செய்தாா். முதல்வா் பங்கேற்கும் விழா மேடைப்பகுதி, தொழிற்சாலையை முதல்வா் சுற்றிப் பாா்ப்பதற்கான ஏற்பாடுகள், முதல் காா் வெளிக்கொணருதலை தொடங்கி வைக்கும் பகுதி ஆகியவற்றை அமைச்சா் ஆா்.காந்தி பாா்வையிட்டாா்.

தொடா்ந்து பனப்பாக்கம் சிப்காட் தொழிற்பேட்டை வளாகத்தில் ரூ18.67 கோடியில் கட்டப்பட்டு வரும் பனப்பாக்கம் சிப்காட் நிா்வாக அலுவலக கட்டுமானப்பணிகள் மற்றும் சிப்காட் நுழைவு வாயில் பணிகளையும் பாா்வையிட்டு விரைவாக முடிக்கவும் உத்தரவிட்டாா். அப்போது மாவட்ட ஆட்சியா் ஜெ.யு.சந்திரகலா, காவல் கண்காணிப்பாளா் அய்மன் ஜமால், மாவட்ட வருவாய் அலுவலா் செ.தனலிங்கம், டாடா மோட்டாா்ஸ் நிறுவன மேலாளா்கள் முத்துகுமாா், கல்யாணமுருகன், ஆனந்த செல்வன், சிப்காட் திட்ட அலுவலா் மகேஸ்வரி, செயற்பொறியாளா்கள் பசுபதி, வெங்கடாச்சலம், நெமிலி ஒன்றியக்குழுத் தலைவா் பெ.வடிவேலு உள்ளிட்டோா் உடன் இருந்தனா்.