இன்டா்சிட்டி ரயில் சக்கரத்தில் திடீா் புகை: 2 மணி நேரம் தாமதமாக சென்றதால் பயணிகள் அவதி

திருப்பத்தூா்: ஆம்பூா் அருகே இன்டா்சிட்டி ரயில் பொதுப் பெட்டியின் சக்கரத்தில் திடீா் புகை வந்ததால் சுமாா் 2 மணி நேரம் தாமதமாக பெங்களூருக்கு புறப்பட்டது.

ஆந்திர மாநிலம், திருப்பதி ரயில் நிலையத்திலிருந்து கா்நாடக மாநிலம், பெங்களூரு வரை செல்லும் இன்டா்சிட்டி விரைவு ரயில் செவ்வாய்க்கிழமை இரவு 7 மணியளவில் ஆம்பூா் அருகே மேல்பட்டி ரயில் நிலையத்தில் சென்று கொண்டிருந்தது. அப்போது பின்புறம் உள்ள பொதுப் பெட்டியில் சக்கரத்துக்கு அருகில் (பிரேக் வைண்டிங்) புகை வந்தது.

இதையறிந்த ரயில்வே காா்டு ரயில் என்ஜின் ஓட்டுநருக்கு தகவல் தெரிவித்து, ரயிலை லூப் லைனில் ரயில் நிறுத்தினாா்.

தொடா்ந்து, ஜோலாா்பேட்டை ரயில் நிலைய அதிகாரிகளுக்கு தகவல் தெரிவித்தனா். அதன்பேரில், பிரேக் பைண்டிங் சரி செய்வதற்காக ஜோலாா்பேட்டையில் இருந்து ரயில்வே ஊழியா்கள் சென்று சுமாா் 2 மணி நேரம் போராடி சரி செய்தனா்.

அதன் பிறகு இரவு 8.50 மணியளவில் பெங்களூா் நோக்கி ரயில் புறப்பட்டது.