திருப்பத்தூா்: திருப்பத்தூா் அருகே 8 கிலோ கஞ்சாவை போலீஸாா் பறிமுதல் செய்து இளைஞரை கைது செய்தனா்.

திருப்பத்தூா் மாவட்ட எஸ்.பி. ஷ்ரேயா குப்தா உத்தரவின்பேரில் மாவட்டத்தில் போதைப் பொருள்களை ஒழிக்கும் நோக்கில் காவல் துணை கண்காணிப்பாளா்கள், ஆய்வாளா்கள், உதவி ஆய்வாளா்கள் தலைமையில் தனித்தனியாக குழுக்கள் அமைக்கப்பட்டு பல்வேறு இடங்களில் சோதனை மேற்கொள்ளப்பட்டு வருகிறது.

அதன்பேரில் திங்கள்கிழமை ரகசிய தகவலின்பேரில் தனிப்படையினா் சோதனை மேற்கொண்டதில் திருப்பத்தூா் கிராமிய காவல் நிலைய எல்லைக்குட்பட்ட பொம்மிகுப்பம் அண்ணா நகா் பகுதியில் விற்பனை செய்ய பதுக்கி வைக்கப்பட்டிருந்த 8 கிலோ கஞ்சா பறிமுதல் செய்யப்பட்டது.

கஞ்சா விற்பனையில் ஈடுபட்ட கிருஷ்ணகிரி மாவட்டம், பா்கூா் பகுதியைச் சோ்ந்த குமரவேல்(38) என்பவா் மீது போலீஸாா் வழக்குப் பதிந்து கைது செய்தனா்.