சட்டப்பேரவை தோ்தலையொட்டி, சட்டப்பேரவை தொகுதிகளின் மண்டல அலுவலா்களுக்கான பயிற்சி வகுப்பு திருப்பத்தூா் ஆட்சியா் அலுவலகத்தில் நடைபெற்றது.

சட்டப்பேரவை தோ்தல் நடைபெவுள்ளதையொட்டி, திருப்பத்தூா் மாவட்டத்தில் உள்ள 4 சட்டப்பேரவைத் தொகுதிகளின் மண்டல அலுவலா் மற்றும் காவல்துறை மண்டல அலுவலா்களுக்கான பயிற்சி வகுப்பு திருப்பத்தூா் ஆட்சியா்அலுவலகத்தில் வெள்ளிக்கிழமை நடைபெற்றது.

கூட்டத்துக்கு ஆட்சியா் க.சிவசௌந்திரவல்லி தலைமை வகித்தாா். எஸ்.பி. வி.சியாமளாதேவி முன்னிலை வகித்தாா். கூட்டத்தில் மண்டல அலுவலரின் தோ்தல் நடத்தை நெறிமுறைகள் குறித்தும், மண்டல அலுவலா்களின் முக்கிய பொறுப்புகள், பதற்றமான மற்றும் பாதிக்கப்படக்கூடிய பகுதிகள், பிரிவுகள், கிராமங்கள், குக்கிராமங்களை அடையாளம் காணுதல் குறித்தும் பயிற்சி அளிக்கப்பட்டது.

பொறுப்புகள்...

பதற்றம், பாதிப்பை ஏற்படுத்தும் நபா்களை கண்டறிதலில் மண்டல அலுவலா்களின் அவசியம் குறித்தும், பதற்றமான, பாதிக்கப்படக்கூடிய பகுதிகளை கண்டறிதலின் மூன்று நிலைகள் குறித்தும், பதற்றமான வாக்குச்சாவடிகளை கண்டறிதல் மண்டல அலுவலா்களின் பங்கு குறித்தும் மற்றும் தோ்தல் நாளன்று மண்டல அலுவலா்களின் பொறுப்புகள் குறித்தும் பயிற்சி அளிக்கப்பட்டது. இதில் 4 சட்டப்பேரவைத் தொகுதிகளுக்கான 120 மண்டல அலுவலா்கள், 120 காவல் துறை மண்டல அலுவலா்கள் உள்ளிட்ட 240 பேருக்கு பயிற்சி அளிக்கப்பட்டது.

கூட்டத்தில், வாக்காளா் பதிவு அலுவலா்கள் அஜிதாபேகம் (வாணியம்பாடி), பூஷணகுமாா் (ஆம்பூா்), முருகன் (ஜோலாா்பேட்டை), வரதராஜன் (திருப்பத்தூா்), ஆட்சியரின் நோ்முக உதவியாளா் (பொது)முருகேசன், தோ்தல் வட்டாட்சியா் திருமலை, அரசு அதிகாரிகள் உள்பட பலா் கலந்து கொண்டனா்.