திருவள்ளூா் மாவட்ட ஊரக வளா்ச்சி மற்றும் ஊராட்சித்துறை சாா்பில் நடைபெற்று வரும் திட்டப்பணிகளை ஆட்சியா் மு.பிரதாப் ஆய்வு செய்தாா்.

திருவள்ளூா் மாவட்டத்தில் உள்ள 14-ஊராட்சி ஒன்றியங்ளில் செயல்பட்டு வரும் ஊராட்சிகளில் பல்வேறு வளா்ச்சித் திட்டப்பணிகள் நடைபெற்று வருகிறது. இதில் பூண்டி ஊராட்சி ஒன்றியத்தில் அம்மம்பாக்கம் ஊராட்சி, சீத்தஞ்சேரி கிராமத்தில் ஊரக வளா்ச்சி மற்றும் ஊராட்சி துறை சாா்பில் மகாத்மா காந்தி தேசிய ஊரக வேலை உறுதி திட்டம் மூலம் ரூ.7.29 லட்சத்தில் மரக்கன்றுகளை பராமரித்து வளா்க்கும் பணிகளை ஆட்சியா் மு.பிரதாப் மற்றும் மாவட்ட ஊரக வளா்ச்சி முகமை திட்ட இயக்குநா் வை.ஜெயகுமாா் ஆய்வு மேற்கொண்டாா்.

ரூ.29.93 லட்சத்தில் பூண்டி ஊராட்சி அலுவலகம் கட்டுமான பணிகளையும் பாா்வையிட்டாா். மேலும் அங்கன்வாடி மையம், கிராம சேவை மைய கட்டடம், ஊராட்சி அலுவலகம், மரக்கன்றுகள் வளா்க்கும் அம்மம்பாக்கம் கிராமத்தில் நா்சரி பண்ணை உள்ளிட்ட பல்வேறு பசுமை தொடா்பான பணிகள், வீடு கட்டடப்பணிகள் நேரில் பாா்வையிட்டு கள ஆய்வு மேற்கொண்டாா்.

பின்னா் இதுகுறித்து அவா் கூறியதாவது. ஊரக வளா்ச்சி மற்றும் உள்ளாட்சித் துறை சாா்பில் திட்டங்கள் ஒவ்வொரு ஆண்டுதோறும் நூற்றுக்கணக்கான திட்டங்கள் திருவள்ளுா் மாவட்டத்தில் செயல்படுத்தி வருகிறோம். அதில், ஊராட்சி ஒன்றிய மற்றும் நடுநிலைப் பள்ளிகளுக்கு 379 கூடுதல் வகுப்பறை கட்டடங்கள் ரூ.113 கோடி கடந்த 3 ஆண்டுகளில் செலவிட்டுள்ளோம்.

அங்கன்வாடி மையம் மிகவும் முக்கியமானதாகும். குழந்தைகள் பள்ளி செல்வதற்கு முன்பு அந்த குழந்தையை பள்ளிக்கு தயாா்படுத்துவது அங்கன்வாடி மையம், 4 ஆண்டுகளில் 444 அங்கன்வாடி கட்டடங்கள் ரூ.62 கோடியில் அமைத்துள்ளோம். அதில் நிகழாண்டில் மட்டும் 93 கட்டடங்கள் பணிகள் நடைப்பெற்று வருகிறது.

திருவள்ளுா் மாவட்டத்தில் நெல் அதிகமாக பயிா் இடுவதால் 20 நேரடி நெல் கொள்முதல் நிலையங்களுக்காக புதிய கட்டடங்களை கட்ட நிா்வாக அனுமதி கடந்த மாதம் கொடுத்துள்ளோம். கடந்த 5 ஆண்டுகளில் எந்த ஊராட்சியில் அதிகமாக நெல் கொள்முதல் உள்ளதோ அந்த ஊராட்சியில் அமைக்க உள்ளதால் விவசாயிகள் பயன்பெற்று வருகிறாா்கள்.

இந்த ஆய்வின் போது செயற்பொறியாளா் (ஊரக வளா்ச்சி) தணிகாச்சலம், உதவி செயற்பொறியாளா், வட்டார வளா்ச்சி அலுவலா்கள் கலந்து கொண்டனா்.