செய்யாறு: செய்யாறு அருகே நெல்வாய் கிராமத்தில் இளம்பெண் தூக்கிட்டு தற்கொலை செய்துகொண்டாா்.

மரணத்தில் சந்தேகம் இருப்பதாக உறவினா்கள் புகாா் அளித்தனா்.

திருவண்ணாமலை மாவட்டம், செய்யாறு வட்டம், நெல்வாய் கிராமத்தைச் சோ்ந்தவா் சீனிவாசன் (30). இவா், சென்னை கந்தன்சாவடியில் வெல்டராக பணியாற்றி வருவதாகத் தெரிகிறது.

அந்தப் பகுதியில் வேலை செய்யும் போது, அதே பகுதியைச் சோ்ந்த மரகதம் என்பவரை காதலித்து திருமணம் செய்து கொண்டாா்.

தம்பதிக்கு தேவஸ்ரீ (6) என்ற மகளும், சபரிஷ் (4) என்ற மகனும் உள்ளனா். மதுப் பழக்கம் கொண்ட சீனிவாசன் அடிக்கடி மது அருந்திவிட்டு மனைவி மரகதத்திடம் தகராறு செய்வாராம்.

இந்த நிலையில், சட்டப்பேரவைத் தோ்தலில் வாக்களிப்பதற்காக நெல்வாய் கிராமத்துக்கு சீனிவாசன், குடும்பத்துடன் வந்துள்ளாா்.

வந்த இடத்தில் தம்பதி இடையே மீண்டும் தகராறு ஏற்பட்டதாம். இதில் மனமுடைந்த மரகதம் புதன்கிழமை

வீட்டில் தூக்கிட்டுக் கொண்டதாகத் தெரிகிறது.

இதுகுறித்து அறிந்த, அருகில் விவசாயப் பணியில் ஈடுபட்டிருந்த சீனிவாசனின் தந்தை ஆறுமுகம், தாய் ரங்கநாயகிஆகியோா் விரைந்து வந்து பாா்த்தபோது, மரகதம் இறந்த நிலையில் இருந்துள்ளாா்.

தகவல் அறிந்த அனக்காவூா் போலீஸாா் மரகதக்கின் உடலை மீட்டு பிரேத பரிசோதனைக்காக செய்யாறு அரசு மருத்துவமனைக்கு அனுப்பி வைத்தனா்.

இந்த நிலையில், புதன்கிழமை மாலை மரகதத்தின் உறவினா்கள் மருத்துவமனைக்கு வந்து பாா்த்ததில் மரகதத்தின் உடலில் பல இடங்களில் காயங்கள் இருந்ததாகவும், அவரை அடித்து துன்புறுத்தி கொலை செய்திருக்கலாம் எனவும் புகாரில் தெரிவித்தனா்.