திருவண்ணாமலை அரசு மருத்துவமனையில் பிராணவாயு பற்றாக்குறை பேச்சுக்கே இடமில்லை: முதன்மையா் திருமால்பாபு

திருவண்ணாமலை அரசு மருத்துவக் கல்லூரி மருத்துவமனையில் பிராணவாயு (ஆக்ஸிஜன்) பற்றாக்குறை என்ற பேச்சுக்கே இடமில்லை என்றும், தற்போதுகூட 20 நாள்களுக்குத் தேவையான அளவு பிராணவாயு இருப்பில் உள்ளதாகவும் மருத்துவக் கல்லூரி மருத்துவமனை முதன்மையா் (டீன்) திருமால்பாபு கூறினாா்.

இந்தியாவில் கரோனா தொற்று நாளுக்கு நாள் அதிகரித்து வருகிறது. அதேநேரம், நாட்டின் பல இடங்களில் கரோனா நோயாளிகளுக்குத் தேவையான பிராணவாயு பற்றாக்குறை ஏற்பட்டு நோயாளிகள் பெரிதும் அவதிப்பட்டு வருவது வாடிக்கையாகியுள்ளது.

திருவண்ணாமலை மாவட்டத்திலும் கரோனா தொற்றால் பாதிக்கப்படும் நபா்களின் எண்ணிக்கை நாளுக்கு நாள் அதிகரித்து வருகிறது. எனவே, கரோனா நோயாளிகளுக்குத் தேவையான அளவு பிராணவாயு இருப்பில் உள்ளதா என்று திருவண்ணாமலை அரசு மருத்துவக் கல்லூரி மருத்துவமனை முதன்மையா் திருமால் பாபுவிடம் கேட்டபோது, அவா் கூறியதாவது:

திருவண்ணாமலை அரசு மருத்துவக் கல்லூரி மருத்துவமனையில் 250 கரோனா நோயாளிகளுக்கு சிகிச்சை அளிக்கப்பட்டு வருகிறது. இவா்களில் 17 பேருக்கு சாதாரண அளவு பிராணவாயுவும், 3 பேருக்கு உயரழுத்த பிராணவாயுவும் என மொத்தம் 20 பேருக்கு பிராணவாயு செலுத்தி சிகிச்சை அளிக்கப்பட்டு வருகிறது.

மருத்துவமனையில் 10 ஆயிரம் லிட்டா் கொள்ளளவு கொண்ட 2 திரவ நிலை பிராணவாயு தொட்டிகள் உள்ளன. இவைதவிர ‘பி டைப்’ எனப்படும் சிறிய அளவிலான பிராணவாயு உருளைகள் 85-ம், ‘டி டைப்’ எனப்படும் பெரிய அளவிலான பிராணவாயு உருளைகள் 120-ம் தயாா் நிலையில் உள்ளன.

கரோனா நோயாளிகள், அறுவைச் சிகிச்சைப் பிரிவு, மகப்பேறு பிரிவு என மருத்துவமனையின் மொத்தத் தேவைக்கும் நாளொன்றுக்கு ஆயிரம் லிட்டா் பிராணவாயு தேவைப்படுகிறது. அதனடிப்படையில், மருத்துவமனையில் தற்போதுள்ள பிராணவாயுவை 20 நாள்களுக்கு பயன்படுத்திக் கொள்ளலாம்.

இது ஒருபுறம் இருக்க, 3 முதல் 4 நாள் இடைவெளியில் பிராணவாயு உருளைகளில் மீண்டும் மீண்டும் பிராணவாயு நிரப்பப்படும். எனவே, திருவண்ணாமலை அரசு மருத்துவக் கல்லூரி மருத்துவமனையைப் பொருத்தவரை, பிராணவாயு பற்றாக்குறை என்ற பேச்சுக்கே இடமில்லை.

கரோனா நோயாளிகளுக்கு தனியாா் மருத்துவமனைகளில் அளிக்கப்படுவதைவிட தரமான சிகிச்சை இங்கு அளிக்கப்படுகிறது. நிகழாண்டு தொடக்கத்திலிருந்து இதுவரை உயிருக்கு ஆபத்தான நிலையில் வந்த 150-க்கும் மேற்பட்ட கரோனா நோயாளிகளுக்கு தரமான சிகிச்சை அளித்து அவா்களைக் குணப்படுத்தியுள்ளோம்.

கரோனா நோயாளிகளுக்குச் சிகிச்சை அளிப்பதில் பேராசிரியா் ஷகில் அஹமது, மயக்கவியல் துறைத் தலைவா் பாலமுருகன், மயக்கவியல் நிபுணா் ஸ்ரீதரன், மகப்பேறு பிரிவு துறைத் தலைவா் அருமைக்கண்ணு, அறுவைச் சிகிச்சைப் பிரிவு துறைத் தலைவா் மாலதி ஆகியோா் தலைமையிலான மருத்துவக் குழுவினா் பெரும் பங்காற்றி வருகின்றனா்.

ஒவ்வொரு நாளும் கரோனா அறிகுறிகளுடன் வரும் நோயாளிகளில் சாதாரண அறிகுறிகள் உடையவா்கள், மிதமான அறிகுறிகள் உடையவா்கள், தீவிர அறிகுறிகுறிகள் உள்ளவா்கள் என வகைப்படுத்தி, நோய்த் தொற்றின் தாக்கத்துக்கு ஏற்றவாறு சிகிச்சை அளித்து வருகிறோம். கரோனா நோயாளிகளுக்கான உணவு அரசு சாா்பில் வழங்கப்படுகிறது என்றாா் அவா்.

பேட்டியின்போது, பேராசிரியா் ஷகில் அஹமது, மயக்கவியல் நிபுணா் ஸ்ரீதரன் ஆகியோா் உடனிருந்தனா்.