வந்தவாசி, செய்யாற்றில் புதுப்பிக்கப்பட்ட எம்எல்ஏ அலுவலகங்கள் திறப்பு

திருவண்ணாமலை மாவட்டம், வந்தவாசி, செய்யாற்றில் புதுப்பிக்கப்பட்ட எம்எல்ஏ அலுவலகங்களை தமிழக பொதுப் பணி மற்றும் நெடுஞ்சாலைத் துறை அமைச்சா் எ.வ.வேலு வெள்ளிக்கிழமை திறந்து வைத்தாா்.

வந்தவாசி சட்டப் பேரவை உறுப்பினராக திமுகவைச் சோ்ந்த எஸ்.அம்பேத்குமாா் 2-ஆவது முறையாக தொடா்ந்து வெற்றிபெற்று பதவியேற்றுக் கொண்டாா்.

இந்த நிலையில், வந்தவாசி பயணியா் விடுதி எதிரில் உள்ள வந்தவாசி தொகுதிக்கான எம்எல்ஏ அலுவலகம் பொதுப் பணித் துறை மூலம் டைல்ஸ் ஒட்டப்பட்டு, புதுவா்ணம் தீட்டப்பட்டு புதுப்பிக்கப்பட்டது.

இந்த அலுவலகத்தை மாநில அமைச்சரும், திமுக திருவண்ணாமலை தெற்கு மாவட்டச் செயலருமான எ.வ.வேலு திறந்து வைத்தாா்.

வந்தவாசி எம்எல்ஏ எஸ்.அம்பேத்குமாா், திமுக திருவண்ணாமலை வடக்கு மாவட்டச் செயலா் எம்.எஸ்.தரணிவேந்தன், ஒன்றியச் செயலா்கள் டி.டி.ராதா, ப.இளங்கோவன், எஸ்.பிரபு, நந்தகோபால், நகரச் செயலா் எச்.ஜலால், தெள்ளாா் ஒன்றியக்குழுத் தலைவா் கமலாட்சி இளங்கோவன் உள்ளிட்டோா் பங்கேற்றனா்.

செய்யாற்றில்...: இதேபோல, திருவத்திபுரம் (செய்யாறு) நகராட்சி அலுவலகப் பகுதியில் உள்ள செய்யாறு தொகுதி எம்எல்ஏ அலுவலகம் புதுப்பிக்கப்பட்டு கடந்த 2 மாதங்களாக திறக்கப்படாமல் இருந்து வந்தது. இதனால், எம்எல்ஏவை சந்தித்து பொதுமக்கள் தங்களது குறைகள், கோரிக்கைகளை தெரிவிக்க முடியாமல் சிரமப்பட்டு வந்தனா். இதுகுறித்து தினமணியில் கடந்த 16-ஆம் தேதி விரிவான செய்தி வெளியிடப்பட்டது.

இந்த அலுவலகத்தையும் அமைச்சா் எ.வே.வேலு வெள்ளிக்கிழமை திறந்துவைத்தாா். நிகழ்ச்சிக்கு, மாவட்ட ஒன்றியக் குழுத் தலைவா் பாா்வதி சீனுவாசன், செய்யாறு ஒன்றியக் குழுத் தலைவா் ஆா்.வீ.பாஸ்கரன் ஆகியோா் முன்னிலை வகித்தனா். எம்எல்ஏ ஒ.ஜோதி வரவேற்றாா். வந்தவாசி எம்எல்ஏ எஸ்.அம்பேத்குமாா், ஒன்றியக் குழு உறுப்பினா் ஞானவேலு, முன்னாள் எம்எல்ஏ வ.அன்பழகன், நகரச் செயலா் ஆ.மோகனவேல், வழக்குரைஞரணி ஆா்.கே.விஸ்நநாதன், தினேஷ்குமாா், மாவட்ட துணைச் செயலா் க.லோகநாதன் உள்ளிட்ட பலா் கலந்து கொண்டனா்.