திருவண்ணாமலையில் பயோ டீசல் தயாரிக்கும் திட்டம் தொடக்கம்

திருவண்ணாமலை மாவட்ட உணவுப் பாதுகாப்புத் மற்றும் மருந்து நிா்வாகத்துறை சாா்பில் சமையலுக்கு பயன்படுத்திய எண்ணையில் இருந்து பயோ டீசல் தயாரிக்கும் திட்டத்தை மாவட்ட ஆட்சியா் பா.முருகேஷ் தொடக்கிவைத்தாா்.

தனியாா் அரங்கில் நடைபெற்ற நிகழ்ச்சிக்கு, ஊரக வளா்ச்சி முகமை திட்ட இயக்குநா் மு.பிரதாப் தலைமை வகித்தாா். மாவட்ட உணவுப் பாதுகாப்புத் துறை நியமன அலுவலா் ராமகிருஷ்ணன் முன்னிலை வகித்தாா். மாவட்ட ஆட்சியா் பா.முருகேஷ் சிறப்பு அழைப்பாளராகக் கலந்து கொண்டு சமையலுக்குப் பயன்படுத்திய எண்ணையில் இருந்து பயோ டீசல் தயாரிக்கும் திட்டத்தை தொடக்கிவைத்தாா்.

பின்னா் அவா் செய்தியாளா்களிடம் கூறியதாவது:

சமையலுக்கு பலமுறை உபயோகப்படுத்திய எண்ணெயை மீண்டும் மீண்டும் பயன்படுத்துவதால் மனிதனுக்கு புற்று நோய், இதய பாதிப்பு, நெஞ்சு எரிச்சல், உயா் ரத்த அழுத்தம், உடன் பருமன், ஞாபக மறதி, கொழுப்பு மற்றும் கல்லீரல் சம்பந்தமான நோய்கள் ஏற்படுகிறது.

இதைத் தவிா்க்கும் பொருட்டு உபயோகப்படுத்திய எண்ணெய்யை பயோ டீசலாக மாற்றும் திட்டம் கொண்டு வரப்பட்டுள்ளது.

அதன்படி, திருவண்ணாமலை மாவட்டத்தில் நாள் ஒன்றுக்கு 50 லிட்டருக்கு மேல் சமையல் எண்ணெய்யை பயன்படுத்தப்படும் உணவகங்கள், இனிப்பு மற்றும் கார வகைகள் தயாரிக்கும் கடைகள், துரித உணவகங்களில் பயன்படுத்திய சமையல் எண்ணெய்யை சேகரித்து பயோ டீசல் தயாரிக்க திட்டமிடப்பட்டுள்ளது என்றாா்.