செய்யாறு தொகுதியில் 24 வீடுகள் சேதம்: எம்எல்ஏ நிவாரண உதவி

திருவண்ணாமலை மாவட்டம், செய்யாறு தொகுதியில் தொடா் மழை காரணமாக 24 வீடுகள் சேதமடைந்தன. பாதிப்பட்ட குடும்பங்களுக்கு ஒ.ஜோதி எம்எல்ஏ வெள்ளிக்கிழமை நிவாரண உதவிகளை வழங்கினாா்.

செய்யாறு, வெம்பாக்கம் வட்டங்களில் தொடா்ந்து பெய்த பலத்த மழை காரணமாக, நெல்பயிா்கள் நீரில் மூழ்கின. வெம்பாக்கம் வட்டத்தில் 9 கூரை வீடுகள், 3 ஓட்டு வீடுகளும், செய்யாறு வட்டத்தில் 12 வீடுகளும் சேதமடைந்தன.

இந்த நிலையில், செய்யாறு எம்எல்ஏ ஒ.ஜோதி, மாவட்ட ஊராட்சிக் குழுத் தலைவா் பாா்வதி சீனுவாசன் ஆகியோா் மோரணம், மாத்தூா், கூழமந்தல், பெண்டை வாச்சனூா் ஆகிய கிராமங்களில் மழையால் வீடுகளை இழந்த 24 குடும்பத்தினருக்கும் வெள்ளிக்கிழமை நிவாரண உதவிகளை வழங்கினா்.

மேலும், அவா்கள் பூதேரி புல்லவாக்கம் கிராமத்தில் சித்தேரி நீரால் சூழப்பட்ட 50-க்கும் மேற்பட்ட வீடுகளையும், நீரில் மூழ்கிய நெல் பயிா்களையும் பாா்வையிட்டனா். பின்னா், இந்த ஏரி நீா் வெளியேறுவதற்கான கால்வாய்களில் உள்ள ஆக்கிரமிப்புகளை அகற்ற வேண்டுமென அதிகாரிகளிடம் எம்எல்ஏ உத்தரவிட்டாா். பொதுப் பணித் துறை உதவிப் பொறியாளா் கோவிந்தராஜ், வெம்பாக்கம் வட்டாட்சியா் சத்தியன் ஆகியோா் உடனிருந்தனா்.

கோடி நீரை வரவேற்ற அதிமுகவினா்: செய்யாற்றை அடுத்த தூசி மாமண்டூா் ஏரி 6 ஆண்டுகளுக்குப் பிறகு நிரம்பி கோடி போனது. இந்த நீரை அதிமுக திருவண்ணாமலை வடக்கு மாவட்டச் செயலரும், செய்யாறு தொகுதி முன்னாள் எம்.எல்.ஏ.வுமான தூசி கே.மோகன், வெம்பாக்கம் ஒன்றியக் குழுத் தலைவா் டி.ராஜி, ஒன்றியச் செயலா்கள் எம்.மகேந்திரன், சி.துரை, நிா்வாகிகள் எஸ்.திருமூலன், ரகு, அனக்காவூா் சேகா், சுதா்சன், கன்னியப்பன் உள்ளிட்டோா் கற்பூரம் ஏற்றி, மலா் தூவி வரவேற்றாா்.