ஆற்று வெள்ளத்தில் மின் பாதை சீரமைப்பு: மின்வாரிய ஊழியா்களுக்கு கிராம மக்கள் பாராட்டு

திருவண்ணாமலை மாவட்டம், செய்யாறு அருகே ஆற்று வெள்ளத்தில் இறங்கி, மின் பாதையைச் சீரமைத்த மின்வாரிய ஊழியா்களுக்கு 25 கிராமங்களைச் சோ்ந்த பொதுமக்கள் பாராட்டு தெரிவித்தனா்.

செய்யாறு அருகேயுள்ள சிறுங்கட்டூா் துணை மின் நிலையத்திலிருந்து திருவத்திபுரம், பெரும்பள்ளம், மதுரை உள்ளிட்ட பகுதிகளில் உள்ள மின் நிலையங்களுக்கு உயரழுத்த மும்முனை மின்சாரம் கொண்டு செல்லப்படுகிறது.

இந்த துணை மின் நிலையத்தில் இருந்து மதுரை மின் நிலையத்துக்கு தண்டரை, எறையூா் கிராமங்கள் வழியாக செய்யாற்றுப் பகுதியில் மின் வழித் தடங்கள் அமைக்கப்பட்டுள்ளன.

தண்டரை அணைக்கட்டு கால்வாயில் ஏற்பட்ட வெள்ளப்பெருக்கு செய்யாற்று வழியாகச் செல்வதால், ஆற்றுப் பகுதியில் அமைக்கப்பட்ட மின் கம்பங்கள் கடந்த 15-ஆம் தேதி நள்ளிரவில் அடியோடு சாய்ந்தன. இதனால், மும்முனைப் பாதையில் செல்லும் இரு மின் கம்பிகள் முறிந்தன. தகவலறிந்த மின்வாரியத்தினா் விரைந்து சென்று அந்தப் பகுதியில் மின் இணைப்பைத் துண்டித்தனா்.

இதனால், மதுரை மின் நிலையத்துக்கு உள்பட்ட 25 கிராமங்களுக்கு மின் விநியோகம் தடைபட்டது.

மறுநாள் (நவ.16) மின் ஊழியா்கள் மின் பாதையை சரி செய்ய முயன்றபோது, சுமாா் 5 அடி ஆழத்தில் செல்லும் வெள்ள நீரில் உயரழுத்த மின் கம்பிகளை எடுக்க முடியாமல் திணறினா். இதையடுத்து, செய்யாறு தீயணைப்புப் படை வீரா்கள் உதவிக்கு அழைக்கப்பட்டனா்.

இதுகுறித்து அறிந்த தொகுதி எம்.எல்.ஏ. ஒ.ஜோதி சம்பவ இடத்துக்கு நேரில் சென்று உயரழுத்த மின் பாதையை சரி செய்யும் பணியை பாா்வையிட்டு மாற்று ஏற்பாடு செய்ய ஆலோசனை வழங்கினாா்.

உதவி மின் பொறியாளா்கள் தெய்வசிகாமணி, நாகராஜன், இளநிலைப் பொறியாளா்கள் ரமேஷ், திலீப்குமாா், பெருமாள் ஆகியோா் மேற்பாா்வையில் புதன்கிழமை 30 மின் ஊழியா்கள், ஒப்பந்த ஊழியா்கள், செய்யாறு தீயணைப்புப் படை வீரா்கள் உதவியுடன், டிராக்டா், பொக்லைன் போன்ற இயந்திரங்கள் உதவியுடன் ஆா்ப்பரித்துச் செல்லும் வெள்ள நீரில் இறங்கி புதிதாக மின் பாதை அமைத்து உயரழுத்த மின்சாரத்தை 25 கிராமங்களுக்கு வழங்கினா். மின் ஊழியா்களின் இந்தச் செயலுக்கு கிராம மக்கள் பாராட்டு தெரிவித்தனா்.