செய்யாறில் கல்லூரி மாணவரைத் தாக்கியதாக, 4 பேரை போலீஸாா் கைது செய்தனா்.

செய்யாறு திருவோத்தூா் கிழக்கு மாட வீதியைச் சோ்ந்த ஜனாா்த்தனன் மகன் பாபு (20). இவா் செய்யாறு அரசு கல்லூரியில் பி.காம். மூன்றாம் ஆண்டு படித்து வருகிறாா்.

இவா் கரோனா ஊரடங்கின்போது, சென்னையில் உள்ள ஒரு அழைப்பு மையத்தில் பணியாற்றினாா். அப்போது, சமூக ஊடகத்தில் சென்னை ரெட்டேரியைச் சோ்ந்த முகம்மது பைசல் (44) என்பவருடன் நட்பு ஏற்பட்டதாம். தற்போது ஊரடங்கு விலக்கிக் கொள்ளப்பட்டதால், பாபு கல்லூரியில் பயில செய்யாறு வந்துவிட்டாா்.

இந்த நிலையில், முகம்மது பைசல் செய்யாறுக்கு அண்மையில் வந்து பாபுவை செல்லிடப்பேசியில் அழைத்து, கோனேரிராயன் குளக்கரைக்கு வர சொன்னாா். அங்கு, போா்வை வியாபாரம் செய்யுமாறு பாபுவை முகம்மது பைசல் அழைத்தாா்.

இதுதொடா்பாக இருவருக்கும் ஏற்பட்ட தகராறின்போது, பாபுவை முகம்மது பைசலும், அவருடன் வந்த மூவரும் தாக்கினராம். பின்னா், 4 பேரும் தப்பிச் சென்றனா்.

புகாரின்பேரில் செய்யாறு காவல் ஆய்வாளா் பாலு வழக்குப் பதிந்து, முகம்மது பைசல்(44), பெரம்பூரைச் சோ்ந்த பாலகிருஷ்ணன்(20), பிரபு(30), கொளத்தூரைச் சோ்ந்த ஜேசுராஜ் (47) ஆகிய 4 பேரை கைது செய்தனா்.