திமுக அரசு செயல்படுத்தும் திட்டங்கள் தமிழகத்தின் வருங்கால அடையாளங்களாக மாறும் என்று முதல்வா் மு.க. ஸ்டாலின் குறிப்பிட்டாா்.

திருவண்ணாமலையில் புதிய திட்டப் பணிகளுக்கு அடிக்கல் நாட்டு விழா, நிறைவுபெற்ற திட்டப் பணிகளின் திறப்பு விழா, பல்வேறு அரசு நலத் திட்ட உதவிகள் வழங்கும் விழா உள்ளிட்ட முப்பெரும் விழா சனிக்கிழமை நடைபெற்றது.

முதல்வா் மு.க.ஸ்டாலின் சிறப்பு அழைப்பாளராகக் கலந்து கொண்டு பேசியதாவது:

தமிழக அரசு சாா்பில் மாபெரும் திட்டங்கள் முன்னெடுக்கப்பட்டுள்ளன. மதுரையில் மு.கருணாநிதி பெயரால் மாபெரும் நூலகம் தயாராகிக் கொண்டிருக்கிறது. சென்னை கிண்டியில் ரூ.230 கோடியில் பன்னோக்கு மருத்துவமனை அமையப் போகிறது. சென்னை மதுரவாயல்-துறைமுகம் இடையே உயா்மட்டச் சாலை அமையப் போகிறது. கிழக்குக் கடற்கரைச் சாலை விரிவாக்கம் செய்யப்பட உள்ளது. இவை எல்லாம் வருங்காலத்தில் தமிழகத்தின் அடையாளங்களாக மாறப் போகின்றன.

திருவண்ணாமலை மாவட்டத்தில் எண்ணற்ற திட்டங்கள் திமுக ஆட்சியில் கொண்டு வரப்பட்டன.

திமுக ஆட்சியில் கொண்டுவரப்பட்ட திட்டங்கள்:

திருவண்ணாமலை மாவட்ட ஆட்சியா் அலுவலகம், சாத்தனூா் அணை புனரமைப்பு, அரசுப் போக்குவரத்துக் கழக மண்டலம், ரூ.120 கோடியில் அரசு மருத்துவக் கல்லூரி, செய்யாறு சிப்காட் தொழில்பூங்கா, திருவண்ணாமலையில் ஒருங்கிணைந்த நீதிமன்ற வளாகம், புதை சாக்கடைத் திட்டம், நகராட்சிக்கு ரூ.36 கோடியில் கூட்டுக் குடிநீா்த் திட்டம், புதிய விளையாட்டு மைதானம், நீச்சல் குளம், கலசப்பாக்கம் பகுதியில் மிருகண்டாநதி நீா்த்தேக்கம், செங்கம் அருகே குப்பநத்தம் அணை, போளூா் அருகே செண்பகத்தோப்பு அணை, தண்டராம்பட்டு தனி வட்டம், தண்டராம்பட்டில் நுகா்பொருள் வாணிபக் கழகக் கிடங்கு, புதுப்பாளையம் பேரூராட்சிக்கு சாத்தனூா் அணை கூட்டுக் குடிநீா்த் திட்டம், செங்கத்தை அடுத்த அம்மாபாளையத்தில் ரூ.60 கோடியில் பால் பவுடா் தொழிற்சாலை, வந்தவாசி அரசுக் கல்லூரிக்கு ரூ.8 கோடியில் புதிய கட்டடம், ஆரணியில் அண்ணா பல்கலைக்கழகப் பொறியியல் கல்லூரி போன்ற திட்டங்கள் எல்லாம் திமுக ஆட்சியில் கொண்டு வரப்பட்டன.

மாவட்டத்தில் பல்வேறு அரசுத் திட்டங்கள் சிறப்பாகச் செயல்படுத்தப்பட்டு வருகின்றன. குறிப்பாக, நீா்மேலாண்மைப் பணிகளை சிறப்பாக செய்துள்ள மாவட்டமாக இந்த மாவட்டம் அமைந்துள்ளது. 1,121 பண்ணைக் குட்டைகளை 30 நாள்களில் அமைத்து சாதனை படைத்துள்ளது இந்த மாவட்டம்.

பண்ணைக் குட்டைகளின் கரைகளில் மரம், காய்கறி, பழச்செடிகள் நட்டு பராமரிக்கப்பட்டு வருகிறது.

இதனால், திருவண்ணாமலை மாவட்டத்தின் நிலத்தடி நீா்மட்டம் 6 முதல் 7 அடி வரை உயா்ந்துள்ளதாக ஆய்வில் தெரியவந்துள்ளது. இதுபோன்ற சாதனையை அனைத்து மாவட்டங்களும் செய்ய வேண்டும்.

இந்தியாவில் முதல் முறையாக..:

இந்தியாவில் முதல் முறையாக தெள்ளாறு ஊராட்சி ஒன்றியத்தில் சுய உதவிக் குழுக்களின் கூட்டமைப்பு மூலம் பாரத் பெட்ரோலிய நிறுவனத்துடன் இணைந்து பெட்ரோல், டீசல் சில்லறை விற்பனை நிலையம் அமைக்கப்பட்டு, மாதம் ரூ.1.30 லட்சம் லாபம் ஈட்டுகின்றனா்.

ஜவ்வாது மலையில் பழங்குடியின மகளிா் சுய உதவிக் குழுக்களைச் சோ்ந்த 2,500 போ் சோ்ந்து உற்பத்தியாளா் நிறுவனத்தை தொடங்கி உள்ளது நல்ல முயற்சி. இதுபோன்ற நல்ல முயற்சிகளை மாவட்ட நிா்வாகம் முன்னெடுத்து வருகிறது.

வேளாண் துறையில் சிறப்பிடம்:

நிலக்கடலை சாகுபடியில் தமிழகத்திலேயே திருவண்ணாமலை மாவட்டம் முதலிடம் பிடித்துள்ளது. நெல் உற்பத்தியில் 3-ஆவது இடம் பிடித்துள்ளது. மலைக் குன்றுகளைப் பசுமையாக்கும் முன்மாதிரி முயற்சியாக ‘பசுமைக் குன்றுகள் திட்டம்’ என்ற திட்டம் இந்த மாவட்டத்தில் செயல்படுத்தப்பட்டு வருகிறது என்றாா் அவா்.

விழாவில், ஒரு லட்சத்து 71 ஆயிரத்து 169 பயனாளிகளுக்கு ரூ.693 கோடி மதிப்பிலான நலத் திட்ட உதவிகளை முதல்வா் வழங்கினாா். மேலும், ரூ.70 கோடியே 27 லட்சத்தில் 91 நிறைவுற்ற பணிகளை திறந்துவைத்து, ரூ.340 கோடியே 21 லட்சம் மதிப்பிலான 246 புதிய பணிகளுக்கும் அடிக்கல் நாட்டினாா்.

விழாவுக்கு பொதுப் பணி மற்றும் நெடுஞ்சாலைகள் துறை அமைச்சா் எ.வ.வேலு தலைமை வகித்தாா்.

அமைச்சா்கள் க.பொன்முடி, செஞ்சி கே.எஸ்.மஸ்தான், சட்டப்பேரவை துணைத் தலைவா் கு.பிச்சாண்டி, சி.என்.அண்ணாதுரை எம்.பி., எம்.எல்.ஏ.க்கள் மு.பெ.கிரி, எஸ்.அம்பேத்குமாா், பெ.சு.தி.சரவணன், ஓ.ஜோதி ஆகியோா் முன்னிலை வகித்தனா். மாவட்ட ஆட்சியா் பா.முருகேஷ் வரவேற்றாா்.