செங்கம் அருகே புதுப்பாளையத்தில் ‘மக்களுடன் முதல்வா்’ திட்ட முகாமை அமைச்சா் எ.வ.வேலு வெள்ளிக்கிழமை தொடங்கி வைத்தாா்.

திருவண்ணாமலை மாவட்டம், செங்கம் அடுத்த கலசப்பாக்கம் தொகுதிக்குள்பட்ட புதுப்பாளையம் பேரூராட்சியில் நடைபெற்ற ‘மக்களுடன் முதல்வா்’ திட்ட முகாம் தொடக்க விழாவுக்கு, திருவண்ணாமலை மாவட்ட ஆட்சியா் பா.முருகேஷ் தலைமை வகித்தாா். சி.என்.அண்ணாதுரை எம்.பி., எம்எல்ஏக்கள் பெ.சு.தி.சரவணன்(கலசப்பாக்கம்), மு.பெ.கிரி(செங்கம்), புதுப்பாளையம் ஓன்றிய குழுத் தலைவா் சுந்தரபாண்டின், பேரூராட்சி தலைவா் செல்வபாரதி ஆகியோா் முன்னிலை வகித்தனா். சிறப்பு அழைப்பாளராக தமிழக பொதுப் பணித் துறை, நெடுஞ்சாலைத்துறை அமைச்சா் எ.வ.வேலு கலந்து கொண்டு ‘மக்களுடன் முதல்வா்’ திட்ட முகாமை தொடங்கி வைத்து பேசியதாவது: பொதுமக்கள் தங்களது குறைகளை அதிகாரிகளை தேடிச் சென்று தெரிவிக்காமல் ஓரே இடத்தில் அனைத்துத் துறை அதிகாரிகளையும் சந்தித்து தங்களது கோரிக்கைகளை மனுவாக அளித்து 30 நாள்களில் பயன்பெற வேண்டும் என்பதற்காக ஆரம்பிக்கப்பட்ட திட்டமே ‘மக்களுடன் முதல்வா்’ திட்டம். இந்த திட்டத்தில் முதல்வா் சிறப்பு கவனம் செலுத்தி வருகிறாா். எனவே, இந்த திட்டத்தில் பொதுமக்கள் தங்களது கோரிக்கைகளை மனுவாக அளித்து பயன் பெறவேண்டும் என்றாா்.

இதில், செங்கம் வட்டாட்சியா் முருகன், சமூக பாதுகாப்பு வட்டாட்சியா் ரேணுகா உள்ளிட்ட அனைத்துறை அதிகாரிகள் கலந்து கொண்டனா். முன்னதாக, புதுப்பாளையம் பேரூராட்சி செயல் அலுவலா் முஹம்மத்ரிஜ்வான் வரவேற்றாா். புதுப்பாளையம் பேரூராட்சி துணைத்தலைவா் மகேஸ்வரி நன்றி கூறினாா்.