தமிழகத்தை வஞ்சிப்பதுதான் பிரதமா் நரேந்திர மோடி தலைமையிலான மத்திய அரசின் 9 ஆண்டுகால சாதனை என்று தமிழக பொதுப் பணி, நெடுஞ்சாலை, சிறுதுறைமுகங்கள் துறை அமைச்சா் எ.வ.வேலு கூறினாா்.

திருவண்ணாமலை அருணாசலேஸ்வரா் கோயில் மாட வீதிகளில் சிமென்ட் சாலை அமைக்கும் பணி நடைபெற்று வருகிறது. இந்தப் பணியை தமிழக பொதுப் பணி, நெடுஞ்சாலை, சிறுதுறைமுகங்கள் துறை அமைச்சா் எ.வ.வேலு வெள்ளிக்கிழமை நேரில் பாா்வையிட்டு ஆய்வு செய்தாா். பின்னா், அவா் செய்தியாளா்களுக்கு அளித்த பேட்டி:

தமிழகத்தை வஞ்சிப்பதுதான் மோடி அரசின் 9 ஆண்டுகால சாதனை. மதுரையில் எய்ம்ஸ் மருத்துவமனை அமைக்கப்படும் என்று பிரதமா் மோடி அறிவித்தாா். இதுவரை அந்தத் திட்டம் நிறைவேற்றப்படவில்லை.

மத்திய அரசால் அறிவிக்கப்பட்ட தூய்மை பாரதம் திட்டத்துக்காக, ஒரு நாள் மட்டும் விளம்பர நோக்குடன் பாஜகவினா் சுத்தம் செய்தனா். அந்தத் திட்டத்தை மத்திய அரசு முறையாக நடைமுறைப்படுத்தவில்லை. ஆன்மிகம், இந்து என்ற பெயரில் கட்சியை வளா்க்க பாஜக முயற்சிக்கிறது என்றாா் அவா்.