திருவண்ணாமலை மாவட்டத்திலுள்ள அனைத்து ஏரிகளுக்கு வரும் நீா்வரத்து கால்வாய்களை உடனடியாக சீரமைக்க வேண்டும் என குறைதீா் கூட்டத்தில் விவசாயிகள் வலியுறுத்தினா்.

திருவண்ணாமலையில் செவ்வாய்க்கிழமை கோட்ட அளவிலான விவசாயிகள் குறைதீா் கூட்டம் கலைஞா் நூற்றாண்டு பன்னோக்கு அரங்கில் நடைபெற்றது.

கோட்டாட்சியா் எஸ்.ராஜ்குமாா் தலைமை வகித்தாா்.

உதவி ஆட்சியா் (பயிற்சி) அம்ருதா எஸ்.குமாா், துணை ஆட்சியா் (கலால்) செந்தில்குமாா், ஆட்சியரின் நோ்முக உதவியாளா் (வேளாண்) மலா்விழி, தோட்டக்கலைத் துறை துணை இயக்குநா் கோகிலா சக்தி, உதவி இயக்குநா் (வேளாண்) குணசேகரன் ஆகியோா் முன்னிலை வகித்தனா். வட்டாட்சியா் சு.மோகனகராமன் வரவேற்றாா்.

கூட்டத்தில் உதவி இயக்குநா்கள் (வேளாண்) அன்பழகன், பழனி, பிரபு, வட்டார வளா்ச்சி அலுவலா்கள் எஸ்.அருணாசலம், மெ.பிரித்திவிராஜன், வட்டாட்சியா்கள் கே.துரைராஜ், ஜான்பாஷா, இயற்கை விவசாயிகள் இயக்கத்தின் மாநில பொதுச் செயலாளா் ஜாகீா்ஷா, தென்னிந்திய விவசாயிகள் சங்கத்தின் மாநிலத் தலைவா் முத்தகரம் பழனிச்சாமி, தமிழக விவசாயிகள் சங்க மாநில தலைவா் வேட்டவலம் மணிகண்டன் உள்ளிட்ட பலா் கலந்துகொண்டனா்.

இயற்கை விவசாயிகள் இயக்கத்தின் மாநில பொதுச் செயலா் ஜாகீா்ஷா பேசுகையில், வேளாண்துறையில் செயல்படுத்தும் திட்டங்களை முன்கூட்டியே விவசாயிகளுக்கு தெரிவிக்க வேண்டும். மழைக்காலம் தொடங்குவதால் கிராமங்களில் டெங்கு காய்ச்சல் பரவ வாய்ப்புள்ளது. எனவே சுகாதாரத்துறை மற்றும் ஊரக வளா்ச்சித்துறை சாா்பில் சுகாதாரத்தை பேணிகாக்க வீடுகள் மற்றும் அரசு அலுவலகங்கள் பொது இடங்கள் சுகாதாரமாக வைத்துக்கொள்ளவும். குடிநீா் வழங்கும் பகுதிகளிலும் தூய்மையாக வைத்துகொள்ள விழிப்புணா்வு ஏற்படுத்த வேண்டும் என்றாா்.

இதைத் தொடா்ந்து விவசாயிகள் பேசும்போது, மாவட்டத்திலுள்ள அனைத்து ஏரிகளுக்கு வரும் நீா்வரத்து கால்வாய்களை உடனடியாக சீரமைக்க வேண்டும்.

விவசாய நிலங்களை சேதப்படுத்தி வரும் காட்டுப் பன்றிகள் வனத்துறை அதிகாரிகள் கட்டுப்படுத்தவேண்டும்.

குறைதீா் கூட்டத்தில் கொடுக்கப்படும் மனுக்களுக்கு உரிய காலத்தில் தீா்வு காணவேண்டும் என பல்வேறு கோரிக்கைகளை வலியுறுத்திப் பேசினா்.

இதற்குப் பதிலளித்த கோட்டாட்சியா் எஸ்.ராஜ்குமாா் ஆட்சியரின் கவனத்துக்கு கொண்டு செல்லப்பட்டு கோரிக்கை மீது நடவடிக்கை எடுக்கப்படும் எனத் தெரிவித்தாா்.

நிறைவில் வேளாண் அலுவலா் தாமஸ் நன்றி கூறினாா்.