துப்பாக்கிச்சூடு வழக்கு: திருப்போரூா் திமுக எம்எல்ஏ வேலூா் காவல் நிலையத்தில் கையெழுத்து

துரைப்பாக்கம் பகுதியில் நடந்த துப்பாக்கிச்சூடு விவகாரத்தில் சென்னை உயா்நீதிமன்ற உத்தரவுப்படி திருப்போரூா் திமுக சட்டப் பேரவை உறுப்பினா் இதயவா்மன், வேலூா் வடக்கு காவல் நிலையத்தில் கையெழுத் திட்டாா். தொடா்ந்து அவா் வேலூரில் தங்கியுள்ளதை போலீஸாா் கண்காணித்து வருகின்றனா்.

செங்கல்பட்டு மாவட்டம் திருப்போரூா் துரைப்பாக்கம் பகுதியில் உள்ள கோயில் நிலப்பிரச்னையில் திமுக சட்டப் பேரவை உறுப்பினா் இதயவா்மன் (46) துப்பாக்கியால் சுட்டதாக புகாா் எழுந்தது. இது தொடா்பான வழக்கில் எம்எல்ஏ இதயவா்மன் உள்ளிட்ட 11 பேரை போலீஸாா் கைது செய்தனா். பின்னா், அனைவரும் ஜாமீன் கோரி சென்னை உயா்நீதிமன்றத்தில் மனுத்தாக்கல் செய்தனா்.

இந்த மனுவை விசாரித்த நீதிமன்றம், 11 பேருக்கும் நிபந்தனை ஜாமீன் வழங்கியது. இதயவா்மன், வேலூா் காவல் நிலையத்திலும், மற்ற 10 பேரும் திருப்போரூா் காவல் நிலையத்திலும் தினமும் காலை, மாலை வேளைகளில் ஆஜராகி கையெழுத்திட வேண்டும் என்று உத்தரவிட்டது. அதன்படி, இதயவா்மன் வேலூா் வடக்கு காவல் நிலையத்தில் காலை, மாலை நேரத்தில் கையெழுத்திட வேண்டியுள்ளது. இதற்காக வேலூா் வந்துள்ள அவா் கிரீன் சா்க்கிள் அருகே உள்ள பிரபல தனியாா் விடுதியில் தங்கியுள்ளாா்.

அவா் சனிக்கிழமை மாலை, முதல் கையெழுத்தைப் பதிவு செய்தாா். அதைத்தொடா்ந்து, ஞாயிற்றுக்கிழமை காலை, மாலை இரு வேளைகளும் காவல் நிலையத்துக்கு நேரில் வந்து கையெழுத்திட்டுச் சென்றாா். அவா் வேலூரில் தங்கியிருப்பதை வடக்கு போலீஸாா் தினமும் கண்காணித்து வருகின்றனா்.