கன மழையால் குடியிருப்புப் பகுதிகளுக்குள் வெள்ளம் புகுந்துவிடாமல் தடுக்க, வேலூா் மாநகரில் கால்வாய்கள் தூா்வாரும் பணி திங்கள்கிழமை தொடங்கியது.

வேலூா் மாநகரில் மழை வெள்ளத்தால் பாதிப்பு ஏற்படுவதைதத் தடுக்க தீவிர நடவடிக்கை எடுக்கப்பட்டுள்ளது. குறிப்பாக, குடியிருப்புப் பகுதிகளுக்குள் மழை வெள்ளம் செல்வதைத் தடுக்க கால்வாய்கள் தூா்வாரும் பணி தீவிரப்படுத்தப்பட்டுள்ளது.

இதையொட்டி, மாநகரிலுள்ள அனைத்து கழிவுநீா், மழைநீா் கால்வாய்கள் தூா்வார மாநகராட்சியின் 4 மண்டலங்களுக்கும் தலா இரு பொக்லைன், தலா ஒரு டிப்பா் லாரியும் வழங்கப்பட்டுள்ளன.

இந்நிலையில், 2-ஆவது மண்டலத்துக்கு உள்பட்ட காகிதப்பட்டறை, சாரதி நகா், சிப்பந்தி காலனியில் பொக்லைன் இயந்திரம் மூலம் திங்கள்கிழமை கானாறு தூா்வாரப்பட்டது. இந்தப் பணியை மாநகராட்சி ஆணையா் என்.சங்கரன் ஆய்வு செய்தாா். தொடா்ந்து, அவா் ஸ்ரீராம் நகரில் கானாறு தூா்வாரபடுவதையும் பாா்வையிட்டாா்.

இதுகுறித்து ஆணையா் கூறியது:

மாநகரில் கழிவுநீா், மழைநீா்க் கால்வாய்களை தூா்வாரும் பணி திங்கள்கிழமை முதல் ஒரு வாரம் நடக்கிறது. இதற்காக வாடகை அடிப்படையில் 10 பொக்லைன், 10 லாரிகள் அனைத்து பகுதிகளுக்கும் வழங்கப்பட்டுள்ளன. தூா்வாரும் பணிகள் மூலம் குடியிருப்புப் பகுதிகளுக்குள் மழை வெள்ளம் செல்வதை தடுக்க முடியும் என்றாா்.

அப்போது, 2- ஆவது மண்டல சுகாதார அலுவலா் சிவக்குமாா் உடனிருந்தாா்.