குடியாத்தம் கோபாலபுரம் அருள்மிகு கெங்கையம்மன் கோயில் திருவிழா ஞாயிற்றுக்கிழமை அதிகாலை காப்புகட்டும் நிகழ்ச்சியுடன் தொடங்கியது.

வேலூா் மாவட்டத்தின் முக்கியத் திருவிழாக்களில் ஒன்றான குடியாத்தம் கெங்கையம்மன் கோயில் திருவிழா வரும் 15- ஆம் தேதி நடைபெற உள்ளது.திருவிழாவின் தொடக்கமாக காப்புகட்டும் நிகழ்ச்சி ஞாயிற்றுக்கிழமை நடைபெற்றது.

நள்ளிரவு 12 மணியளவில் குடியாத்தம் தென்குளக்கரையில் இருந்து அலங்கரிக்கப்பட்ட பூங்கரகம் நகரின் முக்கிய வீதிகளில் வழியாகச் சென்று கோயிலை அடைந்தது. அதிகாலை 2 மணியளவில் கோயிலில் காப்புகட்டும் நிகழ்ச்சி நடைபெற்றது.

இதன் தொடா்ச்சியாக வரும் 11- ஆம் தேதி அம்மனுக்கு திருக்கல்யாணமும், 14-ஆம் தேதி தேரோட்டமும் நடைபெறும். திருவிழாவின் முக்கிய நிகழ்ச்சியாக 15- ஆம் தேதி அதிகாலை தரணம்பேட்டை முத்தியாலம்மன் கோயிலில் இருந்து அம்மன் சிரசு ஊா்வலம் நடைபெறும்.

16- ஆம் தேதி மஞ்சள் நீராட்டும், 17- ஆம் தேதி இரவு பூப்பல்லக்கு பவனியும், 22- ஆம் தேதி விடையாற்று உற்சவமும் நடைபெறும்.

காப்புகட்டும் நிகழ்ச்சிக்கான ஏற்பாடுகளை கோயில் செயல் அலுவலா் தே.திருநாவுக்கரசு, கோயில் ஆய்வாளா் சு.பாரி, ஊா் நாட்டாண்மை ஆா்.ஜி.சம்பத், தா்மகா்த்தா கே.பிச்சாண்டி உள்ளிட்டோா் செய்திருந்தனா்.