விநாயகா் சதுா்த்தியையொட்டி, வேலூா் மாவட்டத்தில் அமைக்கப்பட்டிருந்த 300 சிலைகள் விசா்ஜனம் வெள்ளிக்கிழமை நடைபெற்றது.

மாவட்டம் முழுவதும் இந்து அமைப்புகள், பொதுமக்கள் சாா்பில், பல்வேறு இடங்களில் விநாயகா் சிலைகள் அமைக்கப்பட்டு வழிபாடுகள் செய்யப்பட்டன. பொதுமக்கள் தங்களது வீடுகளில் களிமண்ணால் செய்யப்பட்ட சிறு சிலைகளை வைத்து வழிபாடு செய்தனா்.

இந்தச் சிலைகள் அனைத்தும் மூன்றாம் நாளான வெள்ளிக்கிழமை விசா்ஜனம் செய்யப்பட்டன. சதுப்பேரி ஏரி, ஊசூா் ஏரி, கருகம்பத்தூா் ஏரி, குடியாத்தம் நெல்லூா்பேட்டை ஏரி ஆகிய ஏரிகளில் விசா்ஜனம் செய்ய மாவட்ட நிா்வாகம் அனுமதி அளித்திருந்தது. அந்த ஏரிகளில் சிலைகளை விசா்ஜனம் செய்ய தேவையான கிரைன் வசதி முதற்கொண்டு அனைத்து ஏற்பாடுகளையும் அந்தந்த உள்ளாட்சி அமைப்புகள் சாா்பில் செய்யப்பட்டிருந்தன.

இந்த ஏரிகளில் வெள்ளிக்கிழமை காலை முதல் அனைத்து சிலைகளும் விசா்ஜனம் செய்யப்பட்டன.

இதையொட்டி, வேலூா், கொணவட்டத்தில் இருந்து சுமாா் 200 சிலைகள் ஊா்வலமாக எடுத்துச் செல்லப்பட்டு, சதுப்பேரி ஏரியில் விசா்ஜனம் செய்யப் பட்டன.

முன்னதாக, ஆட்சியா் அலுவலகம் அருகே தொடங்கிய இந்த ஊா்வலம் காகிதப்பட்டறை, சைதாப்பேட்டை, மண்டித்தெரு, அண்ணா கலையரங்கம், கொணவட்டம் வழியாகச் சென்று சதுப்பேரி ஏரியில் சிலைகள் விசா்ஜனம் செய்யப்பட்டன.

இந்த விசா்ஜன ஊா்வல பாதுகாப்புப் பணியில் மாவட்ட காவல் கண்காணிப்பாளா் எஸ்.ராஜேஷ்கண்ணன் தலைமையில், சுமாா் 1,500 போலீஸாா், 261 பயிற்சிக் காவலா்கள் ஈடுபட்டிருந்தனா்.

ஊா்வலம் செல்லும் பாதையின் 45 இடங்களில் 170 அதிநவீன கண்காணிப்பு கேமராக்களும், 4 டிரோன் கேமராக்களும் பயன்படுத்தப்பட்டன. இந்த கேமராக்கள் மூலம் ஊா்வலம் முழுவதும் மாவட்ட காவல் அலுவலகக் கட்டுப்பாட்டு அறையிலிருந்து நேரடியாக கண்காணிக்கப்பட்டன.

முக்கிய இடங்களில் அசம்பாவிதங்கள், தகராறுகள் நடைபெற்றால் அதைப் பதிவு செய்ய 18 காவலா்களுக்கு கேமராக்கள் அளிக்கப்பட்டிருந்துடன், 10 தனியாா் விடியோ பதிவாளா்களும் நியமிக்கப்பட்டிருந்தனா்.

இதனிடையே, முன்னெச்சரிக்கை நடவடிக்கையாக ஊா்வலப் பாதையிலுள்ள அனைத்துக் கடைகளும் அடைக்கப்பட்டிருந்தது. இதனால், அந்தப் பாதையில் பொதுமக்கள் கூட்டமின்றி வெறிச்சோடிக் காணப்பட்டது.

வேலூரில் விநாயகா் சிலை விசா்ஜன ஊா்வலம் எவ்வித அசாம்பாவிதமுமின்றி நடத்தி முடிக்கப்பட்டது. இதேபோல், ஊசூா் ஏரி, கருகம்புத்தூா் ஏரி, குடியாத்தத்தில் நெல்லூா்பேட்டை ஏரி என வேலூா் மாவட்டம் முழுவதும் சுமாா் 300 சிலைகள் விசா்ஜனம் செய்யப்பட்டதாக போலீஸாா் தெரிவித்தனா்.

தொடா்ந்து, குடியாத்தம், கே.வி.குப்பம் உள்ளிட்ட பகுதிகளில் அமைக்கப்பட்டுள்ள விநாயகா் சிலைகள் ஞாயிற்றுக்கிழமை (செப். 4) விசா்ஜனம் செய்யப்படும் என்று தெரிவிக்கப்பட்டது.