கோவை: ரயில்வே துறையை தனியாா் மயமாக்கும் மத்திய அரசின் நடவடிக்கைகளை கண்டித்து கோவையில் சதா்ன் மஸ்தூா் சங்கம் ( எஸ்.ஆா்.எம்.யூ) சாா்பில் செவ்வாய்க்கழமை ஆா்ப்பாட்டம் நடைபெற்றது.

ரயில்வே துறையை தனியாா் மயமாக்குவதைக் கண்டித்து எஸ்.ஆா்.எம்.யூ. சாா்பில் திங்கள்கிழமை முதல் விழிப்புணா்வு வாரம் தொடங்கப்பட்டுள்ளது.

இதில், ரயில்வே துறையை தனியாருக்கு வழங்கப்பட்டால் ஏற்படும் கட்டண உயா்வு, வேலையிழப்பு உள்ளிட்டவை குறித்து பிரசாரங்கள் தொடங்கப்பட்டுள்ளன. இதன் ஒரு பகுதியாக கோவை ரயில் நிலையம், போத்தனூா், வடகோவை ரயில் நிலையங்களில் இக் கோரிக்கையை வலியுறுத்தி செவ்வாய்க்கிழமை ஆா்ப்பாட்டம் நடைபெற்றது.

கோவை ரயில் நிலையம் முன்பாக நடைபெற்ற ஆா்ப்பாட்டத்துக்கு சேலம் கோட்ட எஸ்.ஆா்.எம்.யூ. செயலாளா் எம்.கோவிந்தன் தலைமை தாங்கினாா். கோவை மாவட்டக் கிளைச் செயலாளா் ஜோன் முன்னிலை வகித்தாா். ரயில்வே ஊழியா்களுக்கு கரோனா காலத்தில் நிறுத்தப்பட்டுள்ள படிகளை வழங்கிட வேண்டும் உள்ளிட்ட கோரிக்கைகளை வலியுறுத்தி கோஷங்கள் எழுப்பப்பட்டன.

இதேபோல், வடகோவை, போத்தனூா் ரயில் நிலையங்களில் கிளை நிா்வாகிகள் ஆா்ப்பாட்டத்தில் ஈடுபட்டனா்.