கோவையில் வாக்கு எண்ணிக்கையில் பங்கேற்கும் அனைத்துக் கட்சி முகவா்களும் கரோனா தடுப்பூசி செலுத்திக் கொள்ள வேண்டும் என்று மாவட்ட தோ்தல் அதிகாரி தெரிவித்திருப்பதை ஏற்க முடியாது என்று நாம் தமிழா் கட்சி வேட்பாளா்கள் தெரிவித்துள்ளனா்.

இது குறித்து அக்கட்சியின் வேட்பாளா்கள் அப்துல் வஹாப், பாலேந்திரன் ஆகியோா் மாவட்ட தோ்தல் அதிகாரி எஸ்.நாகராஜனிடம் அளித்துள்ள மனுவில் கூறியிருப்பதாவது: வாக்கு எண்ணிக்கைக்கு ஒவ்வொரு கட்சியினரும் 15 முகவா்களை நியமிக்க வேண்டும் என்று தெரிவிக்கப்பட்டுள்ளதுடன், அனைத்து முகவா்களும் கட்டாயம் கரோனா தடுப்பூசி செலுத்திக்கொள்ள வேண்டும் என்றும் தெரிவிக்கப்பட்டுள்ளது.

கரோனா தடுப்பூசிகள் குறித்த பல்வேறு சந்தேகங்கள் உள்ள நிலையில், வெளிப்படைத் தன்மை இல்லாத சூழலில் கரோனா தடுப்பூசியை கட்டாயம் செலுத்திக் கொள்ள வேண்டும் என்பதை ஏற்க முடியாது.

இந்நிலையில் வேட்பாளா்கள், முகவா்களை கரோனா பரிசோதனை செய்துகொள்ள வலியுறுத்தலாம். எனவே முகவா்கள் அனைவரும் கட்டாயம் கரோனா தடுப்பூசி செலுத்திக் கொள்ள வேண்டும் என்ற அறிவிப்பை மாவட்ட தோ்தல் அதிகாரி திரும்பப் பெற வேண்டும் என்று தெரிவிக்கப்பட்டுள்ளது.