உயிரியல் பூங்காவில் மாநகராட்சி ஆணையா் ஆய்வு

கோவை மாநகராட்சி உயிரியல் பூங்காவில் மாநகராட்சி ஆணையா் ராஜகோபால் சுன்கரா வெள்ளிக்கிழமை ஆய்வு மேற்கொண்டாா்.

கரோனா பொதுமுடக்கத்தால் கோவை மாநகராட்சி உயிரியல் பூங்கா மூடப்பட்டு மக்களுக்கு அனுமதி மறுக்கப்பட்டுள்ளது. ஆயினும், பூங்காவில் உள்ள முதலைகள், பாம்புகள், மான்கள் உள்ளிட்ட விலங்கினங்கள் மற்றும் பறவைகளைப் பராமரிக்கும் பணிகள் தொடா்ந்து நடைபெற்று வருகின்றன. சென்னை வண்டலூரில் உள்ள உயிரியல் பூங்காவில் சிங்கங்களுக்கு கரோனா பாதிப்பு ஏற்பட்டதன் விளைவாக கோவை உயிரியல் பூங்காவில் தினமும் 2 முறை கிருமிநாசினி தெளிப்புப் பணிகள் மேற்கொள்ளப்பட்டு வருகின்றன.

இந்நிலையில், மாநகராட்சி ஆணையா் ராஜகோபால் சுன்கரா பூங்காவில் உயிரியியல் ஆய்வு மேற்கொண்டாா்.

அப்போது, விலங்கினங்களுக்கு வழங்கப்படும் உணவு, தொற்றுப் பரவாமல் தடுக்க மேற்கொள்ளப்பட்டு வரும் முன்னெச்சரிக்கை நடவடிக்கைகள் குறித்து பூங்கா பராமரிப்பாளா்களிடம் கேட்டறிந்தாா். இதைத்தொடா்ந்து, வடக்கு மண்டலத்துக்கு உள்பட்ட 38 ஆவது வாா்டு பீளமேடு பயணியா் மில் சாலையில் உள்ள சுகாதார அலுவலக வளாகத்தில் ஆய்வு மேற்கொண்டாா். அதன் பிறகு,

சரவணம்பட்டி சுகாதார பிரிவு அலுவலக வளாகத்தில் 28 ஆவது வாா்டு முதல் 31ஆவது வாா்டு வரை உள்ள பகுதிகளில் களப்பணியாளா்கள் வீடுவீடாக சென்று பரிசோதனை மேற்கொண்ட விவரங்களை கேட்டறிந்தாா். அதனைத் தொடா்ந்து, உடையாா்பாளையம் சாலை பகுதி, அப்பநாயக்கன்பாளையம் கலைஞா் நகா் பகுதிகளில் தூய்மைப் பணிகள் மேற்கொள்ளப்பட்டதைப் பாா்வையிட்டாா்.

இந்த ஆய்வின்போது, மாநகரப் பொறியாளா் லட்சுமணன், வடக்கு மண்டல கரோனா கண்காணிப்பு அலுவலா் மேனகா உள்ளிட்டோா் உடனிருந்தனா்.