போலீஸாா் குடும்பத்தினருக்கு தடுப்பூசி முகாம்

போலீஸாா் மற்றும் அவா்களது குடும்பத்தினருக்கு கரோனா தடுப்பூசி செலுத்தும் முகாம் வெள்ளிக்கிழமை நடைபெற்றது.

மாநகராட்சி மற்றும் சுகாதாரத் துறை சாா்பில் பொதுமக்களுக்கு கரோனா தடுப்பூசி செலுத்தப்பட்டு வருகிறது. முன்களப் பணியாளா்களான காவல் துறையினா், அரசு ஊழியா்கள் மற்றும் தூய்மைப் பணியாளா்களுக்கு சிறப்பு முகாம் அமைக்கப்பட்டு தடுப்பூசி செலுத்தப்படுகிறது.

இதன் ஒரு பகுதியாக கோவை மாநகர போலீஸாருக்கு அவிநாசி சாலையில் உள்ள காவலா்கள் மருத்துவமனையில் கடந்த ஏப்ரல் மாதம் கரோனா தடுப்பூசி செலுத்தப்பட்டது. தொடா்ந்து புகரில் பணியாற்றும் போலீஸாருக்கு கரோனா தடுப்பூசி செலுத்தும் முகாம் கோவை பிஆா்எஸ் மைதானத்தில் வெள்ளிக்கிழமை நடைபெற்றது. இதில் போலீஸாா் மற்றும் அவா்களது குடும்பத்தினா் என மொத்தம் 500க்கும் மேற்பட்டோருக்கு தடுப்பூசி செலுத்தப்பட்டன.

முகாமை ஆட்சியா் ஜி.எஸ்.சமீரன், மாவட்ட எஸ்.பி. செல்வநாகரத்தினம் ஆகியோா் துவக்கிவைத்தனா்.