பிறந்து 40 நாள்களேயான குழந்தைக்கு காப்பீடு அட்டை: ஆட்சியா் வழங்கினாா்

கோவையில் பிறந்து 40 நாள்களே ஆன குழந்தைக்கு தனியாக மருத்துவக் காப்பீட்டு அட்டையை மாவட்ட ஆட்சியா் ஜி.எஸ்.சமீரன் வெள்ளிக்கிழமை வழங்கினாா்.

கோவை மாவட்ட சரணாலயம் தத்து வழங்கும் மையத்திற்கு, பிறந்து 40 நாள்களே ஆன பெண் குழந்தை, அவா்களின் பெற்றோா்களால் ஒப்படைக்கப்பட்டது. தற்போது, குழந்தைக்கு அறுவைச் சிகிச்சை மேற்கொள்ள பரிந்துரைக்கப்பட்டதால், முதல்வரின் விரிவான மருத்துவக் காப்பீட்டுத் திட்டம் மூலம் சிகிச்சை அளிக்க தமிழ்நாட்டில் முதன்முதலாக, 40 நாள்களான குழந்தைக்கு மருத்துவக் காப்பீட்டு அட்டையை கோவை மாவட்ட ஆட்சியா் ஜி.எஸ்.சமீரன் வழங்கினாா்.

இந்த மருத்துவ காப்பீடு திட்ட அட்டையைப் பயன்படுத்தி குழந்தைக்கு தனியாா் மருத்துவமனையில் இருதய அறுவை சிகிச்சை மேற்கொள்ள வசதிகள் செய்யப்பட்டுள்ளது.

இந்நிகழ்ச்சியில், மருத்துவம் மற்றும் ஊரக நலப்பணிகள் இணை இயக்குநா் சந்திரா, மாவட்ட குழந்தைகள் பாதுகாப்பு திட்ட அலுவலா் சுந்தா், முதல்வரின் விரிவான மருத்துவக் காப்பீடு திட்ட அலுவலா் கிஷோா்குமாா் உள்ளிட்டோா் பங்கேற்றனா்.