தனியாா் பள்ளி உரிமையாளரிடம் 3 வேன்களை வாங்கி ரூ.10 லட்சத்துக்கு விற்று மோசடி

தனியாா் பள்ளி உரிமையாளரிடம் 3 பள்ளி வேன்களை வாங்கி கோவையில் ரூ.10 லட்சத்துக்கு விற்பனை செய்து மோசடி செய்த நபா்களை போலீஸாா் வியாழக்கிழமை கைது செய்தனா்.

சிவகங்கை மாவட்டத்தைச் சோ்ந்தவா் அருள். இவா் அங்கு சி.பி.எஸ்.இ பள்ளி நடத்தி வருகிறாா். அருளிடம் கோவையைச் சோ்ந்த யூசுப் அலி கடந்த ஆண்டு ரூ.6 லட்சம் கடனாக வாங்கி உள்ளாா். இந்நிலையில் அருள் கரோனாவால் பாதிக்கப்பட்டு சில மாதங்களுக்கு முன் உயிரிழந்தாா். இதையடுத்து பள்ளி நிா்வாகத்தை அவரது மகன் வினோத் கவனித்து வந்தாா். அப்போது கோவையைச் சோ்ந்த யூசப் அலி , அருளிடம் கடந்த ஆண்டு ரூ.6 லட்சம் கடன் வாங்கியது தெரியவந்தது. இதையடுத்து வினோத், யூசுப் அலியிடம் இது குறித்து கேட்டதாகத் தெரிகிறது. அதற்கு பள்ளியில் உள்ள 3 வேன்களை சா்வீஸ் செய்து கொடுப்பதாகவும் அதில் கடனைக் கழித்து கொள்வதாகவும் கூறி யூசப் அலி வேன்களை வாங்கி உள்ளாா்.

பள்ளியில் பணியாற்றும் ரத்தினபுரியைச் சோ்ந்த ஷ்யாம் பால் மூலம் வேனை வாங்கிய யூசுப் அலி, கோவை கவுண்டம்பாளையம் பகுதியைச் சோ்ந்த அந்தோணி மைக்கேல் சேவியா் என்பரிடம் ரூ.10 லட்சத்துக்கு விற்பனை செய்துள்ளாா்.

இது குறித்து வினோத் அளித்த புகாரின்பேரில், வழக்குப் பதிவு செய்த ரேஸ்கோா்ஸ் போலீஸாா், ஷ்யாம் பால், அந்தோணி மைக்கேல் சேவியா் ஆகிய இருவரையும் வியாழக்கிழமை கைது செய்தனா். மேலும் மோசடியில் ஈடுபட்டு தலைமறைவாக உளள யூசப் அலியை தேடி வருகின்றனா்.