தறியில் நெசவு செய்து, தலைக் கவசம் அணிந்து வேட்பாளா்கள் பிரசாரம்

கோவை மாநகராட்சியில் தறியில் துணி நெசவு செய்தும், தலைக் கவசம் அணிந்தும் வேட்பாளா்கள் வெள்ளிக்கிழமை பிரசாரத்தில் ஈடுபட்டனா்.

நகா்ப்புற உள்ளாட்சித் தோ்தல் சூடு பிடித்துள்ள நிலையில், கோவை மாநகராட்சியில் போட்டியிடும் வேட்பாளா்கள் தீவிர பிரசாரம் மேற்கொண்டு வருகின்றனா். தோ்தலுக்கு இன்னும் சில நாள்களே உள்ள நிலையில், வித்தியாசமாகவும், சுவாரஸ்யமாகவும் வாக்குச் சேகரித்து பல வேட்பாளா்கள் மக்கள் கவனத்தை ஈா்த்து வருகின்றனா். அந்த வகையில், கடந்த நாள்களில் காய்கறி விற்பனை செய்தும், தேநீா் விற்பனை செய்தும் பிரசாரம் மேற்கொண்டது. ஆா்மோனியம் இசைத்து வாக்குச் சேகரித்தது உள்ளிட்ட சுவாரஸ்யமான சம்பவங்கள் நடைபெற்றன.

அந்த வகையில், கோவை மாநகராட்சியில், அதிமுக சாா்பில் 69 ஆவது வாா்டில் போட்டியிடும் கே.எம். கமலக்கண்ணன் சாய்பாபா காலனி அருகே நெசவாளா் காலனி பகுதியில் வெள்ளிக்கிழமை பிரசாரம் மேற்கொண்டபோது, நெசவாளி ஒருவா் வீட்டில் தறியில் துணி நெசவு செய்வு வாக்குச் சேகரித்தாா்.

கோவை மாநகராட்சி 76 ஆவது வாா்டில், பாஜக சாா்பில் போட்டியிடும் காா்த்திக், செல்வபுரம், தெலுங்குபாளையம் பகுதியில் வியாழக்கிழமை பிரசாரம் மேற்கொண்ட போது, மா்ம நபா்கள் அவா் மீது கற்களை வீசி தாக்குதல் நடத்தியதாகக் கூறப்படுகிறது.

இந்நிலையில், பாஜக வேட்பாளா் காா்த்திக் 76 ஆவது வாா்டு பகுதியில் தலைக் கவசம் அணிந்தபடி, தனது ஆதரவாளா்களுடன் வெள்ளிக்கிழமை பிரசாரத்தில் ஈடுபட்டாா்.